Tu bench nge chhah zawk?

Spain leh England-ten squad an nei chhah a, an starting XI-ah player ṭha rual an tlar thei - hei chauh a ni lo, beisei anga game a kaltluan loha game thlak danglam thei tur bench-ah an la nei nual a, tu bench nge chhah zawk? tih chu tam tak zawhna a ni.

England-in tun Euro-ah player la hman miah loh an la neih nual laiin, Spain erawhin player 26 zinga 25 an hmang tawh - an la hman loh awmchhun hi third choice keeper Álex Remiro a ni a, La Roja squad hi an inbuk tawk viau niin a lang.

Chutihrual chuan England bench ila, danglamna thlen ṭhin player an nei. Semifinal-ah minute 89 leh second 59-naah chakna goal an khung a, goal khungtu hi bench aṭanga luhtir Ollie Watkins a ni.

Aston Villa striker goal khung tur siamsaktu hi Cole Palmer a ni a, Chelsea chhuanvawr hi a luh apiangin England game a nung ṭhin - anni pahnih bakah hian Ivan Toney leh Trent Alexander-Arnold chu England-in bench lama player an neih langsar a ni.

Spain-in Alvaro Morata thlak tura striker pangngai an neih chu Joselu a ni a, mahse, Barcelona forward Ferran Torres leh Real Sociedad thiampuipa Mikel Oyarzabal te an awm bawk avangin tlarhmaa squad chhah zawk sawi thiam a harsa.

Midfield-ah Pedri a inhliam avangin Dani Olmo chu bul ṭantu nghet a ni tawh a, mahse, Germany laka ṭha zeta tauh luttu Mikel Merino leh Barcelona midfielder Fermín López an nei a, Jesús Navas, Álex Grimaldo, Nacho Fernandez leh Daniel Vivian te tlarhnung lamah lut mai theiin an nei reng bawk.