Goal hmaah hriam hret a ngai - Aizawl FC coach

Aizawl FC chuan vawiin tlai dar 3:30 hian LZ Juice MPL11-ah Sihphir Venghlun an hmachhawn dawn. I League club-in chak hmel an la hmu lo a, Sihphir Venghlunin point an la hmu lo thung.

I League club hian season liam ta khan semifinal an khel pha lo a, an match hmasa berah chak hmel an hmuh loh avangin nuamsaa knockout stage an lulh theih nan Sihphir Venghlun lakah chak ngei a ṭul.

Aizawl FC coach Victor Lalbiakmawia chuan, "Chawnpui lakah khan inkhel kan thunun a, goal chance pawh kan nei ṭha. Mahse, goal khung kan harsat a, insiamṭhat kan mamawh. Training-naah pawh finishing kan ti tam," tiin Vanglaini hrilh.

I League club hi FIFA-in a hrem vangin player an la ziaklut thei lo a, hei vang hian an player lak thar pawh an la inlan thei lo. Chutihrualin an player neihsa te hi tualchhung player ṭha tho an ni a, chakpui tham an la ni.

Tlarhmaah C. Lalhriatpuia a awm thei a, mual sirah Lalbiakdika leh Augustine Lalrochana te awmin midfield laiah Lalthangkhuma (TK-a) an la nei bawk. Aizawl FC hian Chawnpui lakah goal khat an khung a, Sihphir Venghlun lakah an tlarhma fiahin an awm ang.

Sihphir Venghlun hi MPL club thar a ni a, an match hmasa berah SYS FC an hneh lo. Coach Robert Laldinthara hoten insiamṭhat an mamawh a, insiamṭha turin player thar an neih belh.

AIFF Futsal Championship-a Corbett FC champion puitu PC Lalruatsanga leh Malsawmtluanga te an tel belh a, an goal bawh a na sawt dawn. Chutihrualin Sihphir Venghlunin SYS lakah goal hnih an chhuah a, Aizawl FC lakah goal venhim uluk a ṭul ang.