Man United-in Zirkzee an hnaih

Manchester United chuan Joshua Zirkzee chungchangah Bologna nen inremna an nei hnai a, Dutch striker hi £33.7m man vel tura ngaih a ni. Kum 23 mi Zirkzee hi Euro 2024 khelh mekah Netherlands squad-ah a tel a, hmun pawimawh erawh a chang pha lo.

Zirkzee hian kum 2017 khan Feyenoord aṭangin Bayern Munich a zawm a, kum nga hnuah German club aṭangin £7.15m-in Bologna a pan. Italian club tan hian season liam ta khan match 37 khelin goal 12 a khung a, Champions League khel turin a tlinpui.

Bologna tan season hmang ṭha mah se Ronald Koeman-a hnuaiah a pawimawh tawk lo. Netherlands-in semifinal hial an thleng chungin Zirkzee hian bench aṭangin ṭum hnih chiah a lut a, a inkhelh zat hi injury time chhiar tel loin minute li chauh a ni.

Premier League-in Profit and Sustainability Rules (PSR) khawng taka an kalpui avangin club-te an fimkhur a, Man United pawh sum hmang tam thei dinhmunah an ding lo. Chutihrualin Anthony Martial an chhuahtir avangin French forward thlakna tur an mamawh a, season liam taa rinrawla an neih Rasmus Hojlund pawh FA Cup final-ah bul a ṭan pha lo a, tlarhma lam inthuam chak hi a mamawh hle.

Man United hian coaching staff pawh an thuam chak a, an striker hlui Ruud van Nistelrooy chu assistant manager ni turin Old Trafford-ah a kir. Go Ahead Eagles manager Rene Hake pawhin Nistelrooy hnung a zui bawk.

Erik ten Hag chuan, "Rene leh Ruud ten min rawn zawm hi ka lawm a, an tawnhriat ṭha tak hian nasa takin min pui ngei ang," tiin a sawi. Season liam taa assistant manager Mitchell van der Gaag leh forward coach Benni McCarthy te an chhuak thung.