Chawl tawh mah ila India ka la dah pawimawh - Chhetri

Indian football legend Sunil Chhetri chuan ram tana inkhelh chawlhsan tawh mah se national team-in a tum ram a thlen theih nan a theihna zawng zawng a la chhuah zel tur thu a sawi.

July 10, Nilaini khan India president Draupadi Murmu chuan Durand Cup vawi 133-na atana trophy tour chu Rashtrapati Bhawan Cultural Centre-ah a nei a, he hunah hian India captain hlui Chhetri hi a tel.

Sunil Chhetri chuan, "Kan inkhelh hun chhungin hun lawmawm leh harsa ka tawng a, ka thinlunga awm reng erawh engtik niah emaw chuan India hian kan tum ram hi kan thleng ve ang, tih hi a ni. Tunah inkhelh chawlhsan tawh mah ila, kan tum ram thleng turin ka theihna zawng zawng ka chhuah zui ang," tiin a sawi.

Chettri hian ram tana inkhelh chawlhsan tawh mah se club inelna erawh a la khel chhunzawm dawn a, tun season ISL-ah Bengaluru FC tan a inlan leh dawn. India rama nomawi chawi theih zawng zawng chu Chhetri hian a chawi tawhah a ngaih theih a, Durand Cup-ah pawh hian kum 2022 khan Bengaluru FC hi a champion pui tawh a ni.