Ramhlun Athletic chakna Felix

LZ Juice MPL11-ah Ramhlun Athletics leh FC Bethlehemin football hmuhnawm an pho chhuak a, Felix Lalruatsanga hattrick hmangin Ramhlun 3-2 in an chak. Chakna goal hi injury time-ah Serchhip tlangval Felix-a'n a khung a, man of the match-ah thlan a ni bawk.

Nimin chhun RG Stadium-a inkhelah team pahnih an inngam tawk a, goal venhim aiin goal nawr an pawimawh. Ṭan phat aṭangin goal chance hmuh tur a tam a, inkhel a hmuhnawm hle.

Minute 27-naah goal hmuh tur a awm chauh a, Isak Vanlalpeka ball vawrhluh chu Felix-a'n ṭha zetin a tauh lut. Ramhlun goal an khung hnuah goal venhim an ngai pawimawh a chuang lo a, a hma ai mahin an tlarhnung a pawp.

Ramhlun defence leh goalkeeper inkarah hmunruak a zau avangin Bethelhemin chance an nghah a, an chance neih an hlah nasat vangin Varun chu bench aṭangin an luhtir. Injury time-ah substitute Varun-a ball pek chu Lamzawl tlangval Danny Zorammawia'n ṭha zetin a pet goal.

First half-ah 1-1 a ni a, second half-ah chak tum ve vein an rawn lut. Bethlehem defender fimkhur loh angin Ramhlunin penalty an hmuh a, Mizoram Police laka penalty hlahtu Felix-a'n minute 52-naah a khung.

Ramhlun defender-in ṭul loa Bethlehem forward Valpuia a tackle tluk vangin penalty an chawi a, FCB tan Thanga rawn pen chhuakin minute 58-naah 'cool' zetin a pet lut. Hun tawp dawn thlengin team pahnih chance an ngah a, Ramhlunin chance ṭha an ngah zawk.

Injury time-ah Bethlehemin chak tumin an nawr chhunzawm a, mahse counter attack hmangin Ramhlunin an khung ta thung. Felix-a'n mual vei lam sirah ṭha zeta ball khalh lutin cool zetin Ramhlun chakna goal a khung a, Serchhip tlangval hian MPL match hnih lek aṭangin goal li a khung tawh a ni.