Arsenal leh Chelsea an nêp!

Inrinni zan Premier League inkhelah Arsenal chu an mikhual Sheffield United nen 1-1 in an inhnehtawk a, London club dang Chelsea chu an mikhualna ramah Newcastle United 1-0 a hneh loin an tlawm thung.

Blues hi palinaah an la awm chhunzawm a, an hnuaia awm Manchester United tan umphak theih an la ni lo. Gunners erawh 10-na an ni hram, a sang pali zinga tel a har dawn. Emirates Stadium-a inkhelah Mikel Arteta kaihhruai Arsenal tan kum 18 mi Gabriel Martinelli chuan chawlhlawk hma chiahin goal a khung a, point thum hmuh nan an hmang tlang ngei dawn ni pawhin a lang hman.

Mahse, Sheffield lamin hun tawp dawn hnaiah John Fleck-a hem luh hmanga sutin point khat ve ve an hmu. Chris Wilder-a naute hi pasarihna an ni mek. Wilder chuan, "Team dang hlau lo leh goal khung duh kan ni," tiin a naute a fak. Gunners manager Arteta-a'n captain Pierre-Emerick Aubameyang a chhawr theih loh zanah Alexandre Lacazette chu tlarhma laiah a dah a, Mesut Ozil leh Nicolas Pepe ten thlawp bawk mah se Lyon striker hlui hi goal khung turin a hriam tawk lo - goal an khung belh thei lo hi a tawpah an tuar.

Inkhel dangah Chelsea pawhin an goal khung theih loh an tuar. Frank Lampard-a hote hian inkhel thunun chung siin an hun ṭha neih an bawhpelh zel, mualneitu Newcastle lam tan Isaac Hayde chu hun tawp hma chiahin chakna goal a tauh lut. Blues striker Tammy Abraham-a'n hnai tak aṭangin goal zawnah a pet thei lo, midfielder N'Golo Kante-a shot chu ṭha tak maiin keeper Martin Dubravka chuan a la dansak. Mason Mount, Willian leh Emerson te pawhin an hlah vek - nikum December 26 (Boxing Day) hnua an tlawm lehna hmasa ber an tawn phah a ni.

Chelsea manager Frank Lampard chuan, "First half khan goal bar an tihper a, hun tawp dawnah goal an khung bawk. A bak zawng kha chu kawng engkimah kan thunun vek. Newcastle lam khan an goal ven chauh an ngaihtuah, khatiangah kha chuan hmun awl insiam a harsa ṭhin," a ti.