Mizoram Premier League Under 17 final-ah Dinthar FC leh Mizoram Police FC

Mizoram Premier League Under 17-ah champion thar an awm dawn ta - nimin khan Dinthar FC chuan a zawna season hnih champion tawh Chanmari FC chu 4-2 in an hneh a; Mizoram Police FC-in Aizawl FC chu penalty shootout-ah 3-2 in an hneh. Naktuk chawhnu dar 1:30-ah Lammualah final khelh a ni ang.

MPL Under 17 hi season hnih chhung khelh ni tawhin Chanmari FC an la champion ve ve a, anni hian mimal chawimawina awm theite pawh an hui deuh vek zel. Niminah erawh an hneh loh an tawng a, Dinthar FC-in 4-2 in an hneh a, Lalawmpuia'n goal hnih a thun. Mizoram Police leh Aizawl Fc inkhelh ṭumin hun pangngai leh hun pek belhah a goal lo a, penalty shoot out-ah Police FC rawltharte an vannei ta zawk a ni.

Dinthar FC an nui

MPL lamah Dinthar FC-in an hneh hleitheih loh Chanmari FC chu tun season zawh takah khan an hneh a, Under 17 lamah pawh Dinthar FC-in season hmasa final-a an ngam loh Chanmari FC an hneh ve ta.

Group B lama pahnihna Dinthar FC-in bul ṭan fuh zawkin Vanlalhriata'n minute 12-naah goal a thun a, hei hi minute 17-ah Lawmzuala'n a sût a, half time-ah 1-1 a ni.

Second half an khel a, Chanmari hian goal an chhuah hmasa leh a, Dinthar FC rawlthar Awmpuia'n minute 53-naah goal a thun a, Francis Ramdinmawia'n minute 65-naah thun belhin 3-1 a ni. Minute 81-na a ni a, MPL-ah pawh kan hmuh fo tawh Dinthar FC rawlthar duhawm Lalawmpuia bawkin a khungbelh a, 4-1 a ni a, chak zawk tur a chiang.

Hun tawp dawn ṭepah Ṭhasiama'n Chanmari beiseina siam tumin goal a khung a; nimahsela an thun belh hman tawh lo a, 4-2 in Dinthar FC an chak. Team pahnih inkhel hi a boruak a ṭang a, an inti buai deuh rap rap a, red card paeh pakhat ve vein an hmu a ni.

Mizoram Police an vannei

Aizawl FC hi MPl Under 17-ah 'rinkai' an la ni deuh chiah a, an champion thei lo. Nimina semi final-ah pawh chance ṭha an neihte an hlah a, a tawpah penalty an pet a, an chak ta lo.

Mizoram Police FC hi a tiraha hlauthawng zawkah ṭangin goal an chhuah teuh hle a, an goalkeeper Vannunmawia'n ṭha takin ṭum hnih vel a dang a, Aizawl FC lamah pawh goal hlauhawm a awm ve leh zauh ṭhin.

Minute 90 an khel a, a goal lo. Hun pek belh a ni a, a la goal chuang lo. Penalty an pet ta a, Mizoram Police keeper Vannunmawia'n vawi hnih a dang a, ṭum khat goal bar a per bawk a; Aizawl FC keeper-in vawi khat dangin an goal bar vawi khat per ve tho mah se, a tawpah Mizoram Police FC hi 3-2 in an vannei ta zawk a ni.