Top 100 ah India hlan kai ka tum - Constantine
India football coach thar atana ruat Stephen Constantine chuan tun hmaa India a lo enkawl tawh avangin India chu dinhmun sang taka thlenpui nghal theih a inbeisei thu a sawi a; un thla tawp lama New Delhi rawn thleng tura beisei a ni.
Rilru sukthlek, culture thar leh tihdan inang lo hmachhawna zir tharte chu coach tana thil harsa ber a nih thu sawiin Constantine chuan, "India ah rei tak ka lo awm tawh avangin ka tan chuan heng harsatnate hi a awm ve lo ang, tunah hian World Ranking ah 171-na kan ni mek a, top 100-ah inhlankai ngei kan tum dawn a, chumi atan chuan talent la haichhuah loh tam takte kan haichhuah a ngai dawn a ni'' a ti.
India coach atana ruat a nih hma lawka Rwanda National team hlawhtling taka enkawla world ranking-a 68 hial kaipuitu chuan, khawvel mipui tamna leh sum leh paia hnianghnar zawk India enkawl chu Rwanda enkawl ai chuan phurawm zawka a hriat thu a sawi.
Constantine chuan India chuan a ṭha zawngin hmalam a pan mek nia sawiin, AIFF President Praful Patel hnuaiah professionalism kawng a zawh mek nia a hriat thu a sawi.
India U-23 team pawh enkawl tel nghal tur Constantine chuan India a enkawl hmasak zawk 2002-2005 khan hlawhtling hlea a inhriat thu sawiin, "India youth team-te age group competition hrang hrang khel thei turin kan inhlangkai a, Ian Rush Trophy-ah kan champion bawk a ni'' a ti a, Ian Rush Trophy-a India a champion-pui ṭum hian Mizo rawlthar malsawma chu top scorer a ni a, he team-ah hian Jerry Zirsanga leh Vanlalrova-te pawh an tel nghe nghe.
Constantine chuan a hnathawh tawhte sawi belhin ''Kuwait ram chhungah ngei Kuwait kan hneh a, Jamaica leh Oman draw-in Asian Games-ah kan khel ṭha hle bawk a ni'' a ti a; India hian tun hnaiah a ṭhenawm Nepal, Bangladesh leh Sri Lanka-te a khel tawk chauh a ni!
A hun laiin Japan lakah nasa takin chak lo mah se, India a lo enkawl tawhna chu thlir kirin hlawhtling thawkhat hlea a inhriat thu a sawi a, khatih laia India football dinhmun leh thil neihte thlir phei chuan a hnuhma leh a player-te kha a chhuan hle thu a sawi a ni.