Australian Open 2015 Nadal leh Murray chak nghal

Grand Slam tournament hmasa ber Australian Open chu Janaury 19-ah ṭan a ni ta. Kumin Australian Open hi Sik leh sa tihbuai theih loh turin retractable roof hnuaiah a pumhlumin khelh a ni ang. Player langsar khel tawhten an khingpui an la hneh vek a, Andy Murray leh Rafael Nadal an chak e.

Grand Slam single vawi 14 title la tawh Rafael Nadal chu Melbourne ah a che ṭha nghal a. A match hmasa berah Spanish star hian Mikhail Youzhny a tlawm a ni. Seeded pathumna Nadal hian 6-3 6-2 6-2 in Russian player a hneh.

Nadal hi Grand Slam tournament dangah hnuhma nei ṭha hle mahse Australian Open-ah chuan ṭum khat a champion tawh a. Kum 28-a upa Nadal hi nikum Wimbledon khelh ṭangin inhliam leh dam loh neuh neuhin a tlak buak a, match pawh a khelh tam lo hle. Damkawra Melbourne-a lo kir Nadal hian a match lehah Australian Luke Saville emaw American Tim Smyczek a tum ang.

Andy Murray chuan Indian player Yuki Bhambri chu staright-set in a hneh. Murray hi tunah seeded parukna a ni a, a khingpui lakah hian 6-3 6-4 7-6(7-3) in a chak.

Kum 27 a upa Murray hi set thumnaah a game tlahniam hmanin, 1-4 aṭanga a insiamrem leh hnuah Yuki a hneh ta a ni. A match dawtah Marinka Matosevic nen an inkhel dawn a ni.

Hnehna chang zo lo kum 22 a upa Indian player Yuki Bhambri hian kum 2009 khan Australian Open Junior Championship-ah nomawi a lo chawi tawh a, kumin Australian Open khelhah rank hniam ber a ni, rank 317-na ni mahse a la naupang a, hma hun a eng hle a ni. Murray pawhin Yuki hian a khel ṭha hle tih a sawi ve bawk.

Hmeichhe lamah seeded pangana Ana Ivanovic chuan hneh loh tawngin Australian Open first round-ah a tla a nghal. Ivanovic hnehtu Lucie Hradecka hi rank 160-na a ni a, set hmasa khel chhe mahse insiamrem theiin 1-6, 6-3, 6-2 in a chak.