West Ham an chak ta

Game nga chhung chak an neih loh hnuah West Ham United chu an chak ta a, Pathianni khan Hull City chu 3-0 in an hneh. West Ham hi pasarihna niin Liverpool chungah an awm.

Pathiannia inkhelah hian first half-ah a goal lo. Second half a ni a, Sam Allardyce-a hnuaia harhtharna chang mek Andy Carroll chuan minute 49-naah goal khatna a thun a, hei hi Enner Valencia thawh rah a ni. Minute 69-naawh West Ham tan Morgan Amalfitano chuan Valencia ball pek chu a thun leh a; Alex Song-a thawhrah sengin Stewart Downing chuan goal thumna a khung zui.

West Ham United hi tun hnaiah che chhe deuh mah se season bul an ṭan ṭhat avangin tunah hian Champions League khelh beisei phakin an la awm a, Hull City erawh tun hnai game riata an vawi ruk chak lohna a ni a, an talbuai hle.

West Ham Boss Big Sam chuan khelh mawi ringawt chu a tawk lo tih a sawi a, ball hlauhawm tak vawrh luh chu a la ṭangkai reng tih a sawi. Big Sam-a inkhelhtir dan hi mi tam takin 'a hmanlai' tiin an sawisel ṭhin a; nimahsela coach tawnhriat ngah tak chuan, "Penalty box-a ball ṭha tak vawrh luh hi a la ṭangkai reng a, hei hi a la hlauhawm reng a ni," tiin an khelh dan chu an ṭangkaipui thu a sawi.