Zaninah Anfield-ah Chelsea

Zanin hian League Cup semi final-ah Liverpool leh Chelsea an inkhel dawn. Ten Action lamah live-in a en theih dawn a, zing lam dar 1:15-ah an inkhel ṭan ang.

League Cup semi final hi home and away-a khelh ṭhin a ni a, Liverpool khelmualah an lut hmasa ang. Jose Mourinho hian cup inchuhah record nei ṭha hle mah se Liverpool laka a record hi a ṭha vak lo a, cup inchuhnaah vawi kua intum tawhin Mourinho hian a naute ṭum hnih chiah a la chakpui a ni.

Hetihlai hian Brendan Rodgers-a tan he inkhel hi a pawimawh dawn a, League Cup hi an captain chhuak tur Steven Gerrard-a champion nomawi nena an thlah theihna hnai ber a nih hmel a, an ṭang hle ang. Stevie G hi a inhliam avangin a khelh theih dawn leh dawn loh a la hriat loh.

Gerrard faktu Mourinho

Chelsea Manager Jose Mourinho chuan transfer-a a thil tawn tawh chungchang a sawinaah, Chelsea-a Steven Gerrard lakluh a hlawhtling lo chu thil pawi ber a ni tih a sawi. Gerrard hi Chelsea khingpui team ni mahse Mourinho hian a zah leh a ngaihsan thu a sawi bawk a ni.

England captain lo ni tawh Gerrard chuan kum 17 Liverpool-a hun a hman hnuin tun nipuiah Los Angeles team Galaxy a pan dawn a, Chelsea boss chuan Gerrard a fak nasa hle. Mourinho hian 2005-a Chelsea Manager a nih hmasakin Liverpool captain hi a lo lalut hman ṭhelh tawh a nih kha.

Mourinho chuan, "Kan theihna zawng zawng sawrkhawmin tih tur pawh a ṭul apiang kan hmaih lo a, kan lalut thei ta lo kha mak ka ti a ni. Ka suangtuahnaah chuan Claude Makelele, Gerrard leh Franck Lampard-te hi midfiled-ah inkawp se, duhthusam a ni ngei ang," a ti.