Juv-in Carlos Tevez goal hnih an chakpui

Juventus chuan Carlos Tevez goal hnih khung chhawr tangkaiin Serie A title an inchuhna kawnga Roma nena an inkar point ngaa a tizau turin Verona 4-0 in an hneh.

Coppa Italia inchuhna a 6-1 a an lo sawp tawh hnu hi Massimiliano Allegri's naute hian an dim lo hle a, Paul Pogba chuan inkhel ṭan aṭanga minute thumna lekah yard 30 vela hla atanga kawh pawta petin Juventus hmahruaina a khung nghal a, hei hi Tevez goal-in an chhunzawm nghal.

Serie A an game hnuhnung pahniha draw result bak hlawh chhuak zo lo Juventus hian goal hnih lek ah an duhtawk mai lo, Andrea Pirlo, Martin Caceres leh Alvaro Morata-te chuan Verona goal an rum ṭhaih ve leh a, mahse an khung thei mai lo. Aturo Vidal dam loh vanga lut Roberto Pereyra hun a thleng a, ani hian a chance neih chhunah hlah loin Juve goal thumna a khung a; Juve hlim authawm a reh fel hmain he inkhela goal lina chu Tevez chuan a khung ve leh ta a ni.

He inkhela khel ṭha em em mai Paul Pogba chu a pu Massimiliano Allegri chuan a fak hle a, khawvela player ṭha ber a la nih theih thu a sawi a, FIFA Ballon d'Or dawng thei tur khawpin theihna a nei a ni, a ti.

Allegri chuan Verona an hneh ṭuma goal khat khunga khel tha em em mai Pogba chu veteran player ang maia an en a nih thu a sawi a, Ballon d'Or dawng turin Champions League leh trophy lian tham a dawn a ngai a ni, a ti a, chu trophy dawng tur chuan theihna a nei a ni a ti bawk.