La Liga hattrick 22-na siamtu Messi
Pathianni zanah mikhual team Barcelona-in Deportivo La Coruna 4-0 in an sawp a, Lionel Messi chuan a club tan hat-trick vawi 30-na a siam a, hei hi La Liga League bika a hat-trick vawi 22 a siamna a ni bawk. Inkhel dangah Madrid khaw club Real Madrid leh Atletico Madrid an chak ve ve a, La Liga inum danah danglamna a thleng lo.
Barca chanchin
Inkhelah hian Barca-in ball an chang hnem zawk a, goal hmasa ber hi minute 10 chauh an la khelhin Deportivo goal-ah chiang zetin Messi hian a tauh lut. A vawi hnih nan goalkeeper Fabrico chu pet khumin goal-a khung leh a, goal mawi tak chu a ni ngei mai! Barca hian an nawr chhunzawm zel a, record a siamna goal hnuhnung hi Messi'an a ke vei lamin a khung a, a tan leh club tan pawh hun chhinchhiah reng tur a ni. Goal lina erawh Barca thawhrah chu ni tho mahse Deportivo defender Sidnei chuan mikhual tan an lamah a ti-goal palh a ni.
Messi leh a chhehvel
Tun hnaia Athletico Madrid an hneh ṭumin Argentina captain hi a thawhhlawk hle tawh a; Deportivo an sawp zanah record nen Messi hian khelmual chhuahsanin, Real Madrid an umna kawngah an inringtawk sawt ang le.
Messi leh an manager Luis Enrique inkar chuan sawi a la hlawh zui zel a; World Player of the Year ṭum li lo ni tawh Messi hian kum 13 a nih aṭanga a zawm tawh an club inrelbawl dan leh an khelh dan style-ah lungawi lo hle niin sawi a tam hle. Messi chuan hemi chungchangah club chhuahsan phah erawh a rilruk hran lo a, coach nen an inkar hi chu a fel zan lo a nih hmel a, a inkhel erawh a nghawng lo.
Luis Enrique chuan, "Season tluanin Messi hi a ṭangmar reng a, game ropui tak a lantir a ni. Tlakchhiatlai a nei ngai lo tluk a ni a, hei hian a inthlahdah ngai lo tih a lantir," tiin a fak.
Messi hian kum 2009 aṭanga kum 2012 chhung khan khawvela player ṭha ber chawimawina a lo dawng tawh a, Barca tana a khelh tawhna inelna zawng zawngah hat-trick a lo siam tawh a, Argentina tan hian ṭum thum hattrick a siam tawh bawk a ni.
Madrid lam ve thung
La Liga table-a chungnung Real Madrid-in an dinhmun sawhnghet zelin, Pathianni zanah Getafe an sawp a, Real tan Cristiano Ronaldo, Karim Benzema leh Gareth Bale-ten goal khungin 3-0 in an chak.
Real Madrid hian first half-ah hun ṭha an nei nual a, goal bulah chance nei ṭhin mahse an vanduai a tih theih a, goal bar an tihper. Getafe tlarhnung a phui ṭhain an taimak rah pawh a ni a, minute 45 hnuah goal awm loin an chawl.
Second half a ni a, FIFA Ballon dór award dawng hlim Ronaldo in goal a khung a, hei hi French player Benzema thawhrah tihloh rual a ni lo. Chumi hnu lawkah counter-attack hmangin vei lam aṭanga James Rodiguez thlawpna nen Bale-in goal hnihna a khung. Hei hi mikhual goal hnuhnung a la ni lo cheu a, Rodriguez bawk a ṭangkai leh ta - minute 79-naah Rodriguez chuan Ronaldo goal thun tur a siamsak a, penalty spot bul aṭangin a tauh lut a ni.
Inkhel dangah La Liga mawngphah team Granada lakah si hnih faiin Athletico Madrid an chak a, Mario Mandzukic leh Raul Garcia ten goal an khung.
First half-ah Granada player Abdoul Sissoko chuan box chhungah Diego Godin titluin penalty an chawi. Penalty hi Mario Mandzukic chuan goal-ah chantirin mikhual team-in hma an hruai. Substitute Raul Garcia a rawn lut a, hun tawp lamah Arda Turan-a cross ball chu goal-ah chantirin point thum an hmuh belh a. Tunah La Liga table pathumnaah awm mekin Barca nen point thumin an inthlau a ni.