Sampdoria leh Fiorentina chak zanah Milan an tlawm

Sampdoria leh Fiorentina-te chuan season thar atana European football an beiseina chhawm nung turin Pathianni khan khual-mualah hnehna an chang a; AC Milan erawh Atalanta-in San Siro ah 1-0 in an hneh a, season thar atana Champions League an beiseina a bo a ni ber tawh.

Sampdoria tan Gonzalo Bergessio leh Robertto Soriano-te chuan October hnua vawi hnih an chak zawnna hmasa ber hmel hmu turin goal khat ve ve Parma lamah an khun a; hei hi tun season-a Sampdoria an chak vawi riatna a ni a, he result hian Serie A table-ah palinaah hlangkaiin Lazio 1-0 a hnehtu Napoli an um zel. Napoli hi table ah pathumna ah awm mekin Sampdoria aia an sanna hi goal difference-ah chiah a ni.

Fiorentina pawh an chak e

Fiorentina Chuan Chievo an draw tawh dawn emaw tih hnuah hun pek belha Khouma Babacar goal thun hmangin hnehna an chang.

Fiorentina hian Gonzalo Rodriguez hmangin minute 35-naah hma an hruai a, mahse hei hi minute 74 naah Sergio Pellissier chuan a chhanglet. Hun tawp dawnah Senegal centre-forward Babacar chuan Fiorentina tan tauh goal-in hnehna an chanpui ta a ni.

Fiorentina chu Serie A table-ah paruknaah an inhlangkai a, hmahruaitu Juventus aia an hniamna hi point 13 niin pathumna Napoli aia an hniamna hi point thum chiah a ni. Serie A a pathumna chin hian Champions League an khel thei dawn a ni.

Milan an chak thei lo

AC Milan chuan an kum chhiat kum an hmang zel a, San Siro-ah an mikhual Atalanta lakah an mualpho. Milan hian Atalanta hi tun hnaia vawi 11 an inhmachhawnah vawi hnih chiah an hneh.

He inkhelah hian Atletico Madrid atanga loan a an hawh Alessio Cerci chuan Milan kawr ha chunga a game hmasa ber a khel a, mahse a match hmasa berah hian a team thar hi chakpui zo loin second half-ah lak chhuah a ni.

He inkhela goal awm chhun hi German mi Denis-a'n Jeremy Menez tihsual zara a khung a ni. Milan hi pariatna niin hmahruaitu Juventus nena an inthlauhna hi point 17 lai a ni a; pathumna Napoli aia an hniamna hi point sarih a ni.

Inkhel dangah Genoa chuan season thara European Competition khel turin beiseina an insiam zel. Genoa hian Sassuolo chu 3-3 in an draw a, Genoa hi table-ah pasarihnaah an awm mek.

Serie A inkhel dangah Torino leh Cesena te 2-2 in an ṭin. Tunah chuan Cagliari Coach Gianfranco Zola pawhin hlim chhan tur a nei ve leh ta a, hun tawp dawna Danilo Avelar's goal hmangin Udinese 2-2 in an draw a ni.