Santosh Trophy Tripura hnehin Mizoramin bul an ṭan

Champion lai Mizoramin Tripura laka goal thun an harsat a, hun rei tak chhung an thun loh hnuah hun tawp dawnah captain Samson Ramengmawia leh H Lalmuankima-te goal hmangin 2-0 in an chak.

Assam-a Marigaon-ah nimin khan Mizoram chuan 69th Senior National Football Championship for the Santosh Trophy Northeast Zonal Round an khel ṭan a, goal thun loin hun rei tak an inkhel a, a tawpah goal hnih an thun a, point thum nen bul an ṭan.

January 23-ah Meghalaya nen an inkhel leh ang a, an chak chuan final round an lut ang. Mizoramin Meghalaya an tum hnuhnung ber chu nikum Dr T Aao Memorial Football final Lammuala khelh kha a ni a, hun pangngaiah inhnehtawkin penalty-ah Mizoram an vannei ta zawk a nih kha.

Tute nge khel?

Mizoram tan Lalawmpuia'n goal a veng a, Chanmari FC goalkeeper hi MPL awm hnua best goalkeepr la ni fai vek thei a ni. Left back-ah Chanmari FC player Ruatthara awmin a laiah Dinthar FC captain Ronald Zothanzama leh Chanmari FC defender Lalrinchhana-te an inkawp a, right back-ah Dinthar FC player Lalrinzuala a ding.

Shillong Lajong captain hlui Dinthar FC-a lut ta Samson chu central midfielder niin ani hi Chanmari FC player Ricky Lallawmawma leh Dinthar FC midfielder Johny-te'n an pui a; vei lam sirah Chanmari FC winger MK-a awmin a ding lamah MPL-3 top scorer Lalbiakhlua (Mizoram Police) a ding bawk a, tlar hmaah Chanmari FC utility player Joseph Lalnunpuia mal tlatin bul a ṭan.

Inkhel i thlir ang

Mizoramin inkhel an thunun a, goal pawh an thun teuh hmasa zawk. First half-ah yard 40 vela hla aṭangin Ruatthara'n kawh zet maiin goal bar leh ban inrina tak a pet per dawp a, Biaktea'n uiawm takin hnai set sawtah a hlah bawk.

Tripura pawhin an nawr na ve hle a, clear chance insiam thei lo mah se goal hlauhawm chu an nei ve leh zauh ṭhin. Tripura hian an goal venhim chu thupuiah an nei a, half way line an pêl duh vak lo a, minute 90 goal an chhuah loh theih chuan chance an la nei dawn tih an hria.

Nimahsela minute 80-naah Mizoram substitute Malsawmfela chuan ball lalutin na takin a pet lut phei a, hei hi Samson chuan a lo pet goal a, 1-0 a ni. Minute 85-naah MK-a'n a sir aṭangin ball a luhpui a, Samson-a pe pheiin ani hian rang takin a pe kir a, MK-a hian kil deuh maiah a thun a, 2-0 in Mizoram an chak ta a ni.

Manager thu leh hla

Mizoram team manager Lalbiakzuala chuan, "Kan vanduai mai dawn emaw kan inti hman a, a tawpah kan vannei hram e. Inkhelh a harsa khawp mai. Aizawlah ground ṭhaah hlir kan training a, hetah khelmual a ṭiṭohin a chang si a, player-te'n an duh angin an khel lo a; nimahsela kan insiam ṭhat zel kan beisei," a ti.

Mizoram manager chuan a naute khelh dan chu a lawmawm hle tih a sawi a, "First half-ah tak kha chuan pressure a awm avangin kan buai deuh a, champion lai kan nih avangin anni lamin hneh min duhna a lian bawk si a, kan khel ṭha vak lo a, second half chu kan khel ṭha khawp mai," tiin a sawi.

An khingpui tur Meghalaya chu tunah an la thleng ve lo niin a sawi a, anni hian naktukah Tripura an tum dawn a, he inkhel an en hma loh chuan eng ang team nge an nih ngaihtuah ngaihna pawh an la hriat loh thu a sawi.

Coach-in a naute fak

Mizoram team coach H Vanlalthlanga chuan an duhthusamin bul ṭan lo mah se point thum chu thil hlu tak a ni tih a sawi a, "Kan inkhel chiah kha kan naute an buai tih a hmuh theih nghal a, lei hrula ball an inpek tur kha a kal fuh hleithei ta lo. Kan inzirna khelmual a ṭha si a, Assam-in an khawpui pawh ni lo Marigaon-ah daih min inkhelhtir ta si a, kan buai phah tih phat rual a ni lo. Zirtawpniah kan khel leh dawn chauh a, he mi hma hian a ground hi chu kan hmang thiam hman ang," a ti.

Santosh trophy-a Mizoram lo champion-pui tawhtu chuan, "Training kan nei rei lo chungin kan uluk a, player discipline a ṭha a, kan inrem fuh khawp chuan ka hria. Captain Samson a fakawm a, a tawnhriat ngah kan ṭangkaipui a, mimal takin MK-a a khel ṭha a, goal hnih thun a phû khawp mai," tiin a sawi.

Thlanga chuan an khingpui fakin, "Tripura hi an ti mai mai lo a, nikuma Aizawla lo kal ang ngawt kha an ni lo. An fitness a ṭha a, ball kan chang fâl hman loa pressure min pe nghal zel a, an taima khawp mai. Tripura tia an hming aṭanga teh mai chi an lo ni hauh lo a, kan inbei hle a ni," a ti.