Man City khelmualah Arsenal an chak

Premier League champion tuma intlansiaknaah Manchester City chu Arsenal-in an pawt ding a, Pathianni zana Etihad Stadium-a inkhelah Arsenal-in City 2-0 in an hneh. Santi Cazorla chuan goal khat thunin Olivier Giroud goal khung tur a siamsak bawk a, ball chang tlem zawk Arsenal an chak.

Chelsea chuan Premier League-ah point ngain hma an hruai fâl ta a, January 31-a City leh Chelsea an inkhel dawn a, hei hi Chelsea tan 'champion theihna inkhel' ang hiala ngaih a ni ang.

City hi Premier League-ah bik game 12 hnua an chak loh vawikhatna a ni a, Arsenal hi kum 2010 hnua Etihad Stadium-a an chak leh vawi khatna a ni. Arsenal hian ball an khawih ve meuh lo a, 35% chiah ball an chang a, hei hi ball chan tam lam tehna an hman hnua Premier League-a Arsenal ball chan tlem ber ṭum ni mah se, Premier League champion team khelmualah 2-0 in an chak.

Inkhel hmuhnawm chu

Yaya Toure tel loa inkhel City-in Sergio Aguero chu tlar hmaah bul an ṭantir a, Inrinniah Chelsea an chak tawh avangin chak ngei an tum a, Aguero pawh 100%-a la fit lo chungin a tir aṭangin an luhtir.

City hian ball pawh an chang tam nghal a, Arsenal lamin an goal venhim chu hna pawimawh zawhah an ngai a, ṭum danga an inkhel angin an nawr vak lo. Alex Oxlade-Chamberlain-a ball pek chu Giroud-a'n a tauh goal teuh hle a, he mi hnu lawk hian Arsenal-in penalty an hlawh ta. December 13 hnua a vawi khatna atana inkhel Vincent Kompany chuan Nacho Monreal a tihtluk avangin penalty a chawi a, hei hi minute 24-naah Cazorla chuan a pet goal.

Arsenal-in an goal an veng zel a, an defender pali hmaah player pali dang an intlar a ni ber a, City lamin an su tlang zo lo. Hetihlai hian Arsenal zawkin rang tak takin an nawr lêt a, ball chang tam zawk City hian an phurh belh teuh ṭhin hle.

City manager Manuel Pellegrini chuan James Milner aiah Stevan Jovetic luhtir mah se second half-ah pawh 'clear chance' han tih tur an nei thei lo a, hlauhawm lo takin corner an pet vak vak a, a bak chu khelmual lai vela inpek kual bak tih theih an nei mang lo a, Arsenal goal-a luhpui turin hmun âwl an hmu lo - Arsenal-in an pe lo.

City hian second half ṭan hnuah na takin nawr mah se an lama freekick an hmuhah an che sual a, Cazorla chuan vengtu nei lo Giroud tauh goal turin minute 67-naah a siamsak a, City tlar hnung an che sual. Hun tawp thlengin City-in an nawr a, hun tawp thlengin Arsenal-in goal an chhuah lo - inkhelh chhungin Arsenal goalkeeper David Ospina chuan hna hautak thawh tur a nei lo a ni ber a, City hian nawr viau siin hmun hlauhawmah ball an luhpui thei lo.

Inkhel chik zawkin

Arsene Wenger a harh ta! Season hmasaah he khelmualah hian 3-6 in an chak lo a, City hi tiatpui cheia chei chi an ni lo tih a hre tawh. Inveng chungin bul a ṭan a, a hmingthanpui attacking football khel loin fimkhur takin an goal a veng hmasa a, chumi rah chu a seng ta a ni.

Arsenal buaina ṭhin an full back-te'n an goal an venghim ṭha ta viau a, a laiah Laurent Koscielny leh Per Matesacker-te an ding dun thei tawh bawk a, an phui ṭha. Player langsar ni si lo, khel ṭha em em mai chu an defensive midfielder Francis Coquelin a ni a, ani hma chiahah hian midfieldfer dangte an inrem leh bawk a, an hna an tlin hle.

Alexis Sanchez chu a duhtawka tâl turin tlar hmaah dah a ni a, Giroud-a'n a tih tur tiin a chance hmuhah a tauh goal a, he inkhela fakawm ber erawh Cazorla a ni. Penalty a pet goal a, Giroud-a tauh luh tur a siamsak a ni mai lo a, inkhelh chhungin ball a khawih tam a, an khingpuite ball a chhuhsak tam hle bawk - kum 30 mi a ni tawh tih pawh a hriat loh.

City boss-in tihsual a nei. Aguero a la fit tawk lo tih a chiang a, a tira a luhtir nghal mai avangin an talbuai hnuah inkhel tidanglam thei player luhtir tur a nei tawh lo. Yaya Toure tel lo chuan goal an nawrin tharum an nei lo a, an player che rang leh ball thiam rualin Arsenal midfielder intlarte an su hawng zo tlat lo. Kompany a khel chhia a, ani pawh dam kawr a la ni a, a fitness a la ṭha lo tih inkhelah a hmuh theih.

Heti hian a khaikhawm theih - Wenger-a'n Pellegrini a hneh a ni. Wenger hian tiatpui inbuana inbuan ralah chuan City an hneh lo tih a zir chhuak tawh a, ṭum dang angin attacking football a khel duh lo a; Pellegrini zawk a inveng thiam ta lo a, 65% ball chang siin goal hlauhawm pawh an nei mang lo - an khelmualah an chak lo a, an champion nomawi an thlauh phah hial em?

Eng nge an sawi le?

Wenger a ṭawng ve ta. Tun season-a sawisel hlawh Arsenal boss hian a team chu panganaah dahin palina Manchester United aiin point khat chiahin an hniam tawh tih a hria a, amah sawiseltute a chhâng ṭan ta.

Wenger chuan, "Kan tlar­hnung hian sawisel an tawk nasa a, tun ṭum zet chu ka lawm ngei mai. Kan tum ber chu dik taka inrem fuh a, tun season-a kan la tih theih loh inkhel pawimawha chak a ni a, kan chak ta ngei e," a ti.

Arsenal hian Premier League club lian Chelsea, City leh United hi an ngam lo hle mai a, tun hnaia team lian pathum laka point 51 hmuh theihna inkhela point 10 an hmuhna a ni ve chiah a; Wenger-a naute hian heng team pathumte hi an hneh khât khawp mai a, hei hi mi tam takin 'big game zo lo' tia Wenger an puhna ṭhin a ni.

Wenger chuan, "Mi sawisel hi an hmanhmawh ṭhin a, tun season-ah defender-te an inhliam nasa tih an ngaihtuah lo... tunah chuan kan central defender-te an inkawp fuh leh tawh a, hetiang inkhela goal an chhuah lo thei hi a ropui hle a ni," tiin a sawi.