Chelsea kan hneh a ngai - Pellegrini

Manchester City boss Manuel Pellegrini chuan Premier League-a champion zawn an tumna kawngah January 31-a Chelsea nen an inkhel tur chu a pawimawh tur thu a sawi.

City hian Chelsea hi point ngain an umphak tawh lo a, an chak loh leh chuan Jose Mourinho naute hian point riatin hma an hruai dawn a, hei hi champion-pui tham a nih tawh a rinawm. City an chak a nih erawh chuan an inthlauhna hi point hnih lek a ni leh dawn a, inkhel pawimawh tak a ni dawn.

Etihad Stadium-ah Arsenal an hneh lo zo chiah a, City boss chuan Stamford Bridge lam a thlir nghal a, "Stamford Bridge-a kan inkhel tur hi a pawimawh khawp mai a, kan inthlauhna hi point hniha kan tihzim vat a ngai. Chelsea nena kan inkhel turah hian kan chak a ngai a, kan insiamṭhata kan khelh ṭhin dan pangngaia kan khelh leh theih ka beisei," a ti.

City boss chuan an dinhmun a hre chiang a, "Chelsea nen kan inkhel tur hi thil thui tak hriltu a ni thei dawn a, chak kan tum ang... tun ṭum chu kan khel ṭha lo a, ball chang tam hle mah ila goal bulah ngaihtuahna kan siam thiam lo a, anni lam an inveng thiam bawk si a, kan chak lo a ni," a ti.

An goal chhuahna penalty chu, "Kha kha penalty a nih leh nih loh kei chuan ka hre lo a; nimahsela kha mi hnu khan insiam ṭhatna hun rei tak kan nei. Joe Hart khan dan tur pawh an nei mang lo a, kha ti khawp khan kan nawr a; nimahsela keini lam khan goal hlauhawm kan insiam mang si lo," a ti.

Arsenal an hneh loh chhan sawiin, "Thil pahnih a awm a, pakhat chu penalty kha a ni a, penalty tur a ni lo a, chutih rualin Kompany khan a tih loh tur a ti a ni. Pahnihna chu goal bulah engmah kan ti thiam lo a, an tlarhnung ṭhiah dan kan ngaihtuah chhuak thei lo a, khatiang kha chuan goal thun ngaihna a awm lo. Inkhel kan thunun a, kan nawr chiam a, an tlarhnung zawnah hmun âwl kan insiam thei si lo," a ti.

A player pawimawh Yaya Toure awm loh vanga chak lo an nih leh nih loh an zawt a, "Yaya hi kan player pawimawh a ni a, kan ṭangkaipui ṭhin a; nimahsela ani awm loh pawhin kan chak thei tho a, player pakhata innghat team kan ni lo," tiin a sawi.