Copa Del Rey Quarter Final Zaninah Barca khelmualah Atletico

Barcelona chuan a vawi 27 nana Copa Del Rey (Spanish King's Cup) champion nih an tumna kawngah zanin (naktuk zing) dar 2:30-ah Nou Camp ah Atletico Madrid an mikhual dawn.

Atletico Madrid hian season hmasa khan La Liga Champion ni turin season tawp lama inkhel pawimawh takah Barcelona an lo hneh tawh a, tun hi Barca tan phuba lakna hun ṭha a ni. Kha inkhelah khan La Liga champion ni turin Barca-in chak ngei ngei an mamawh laiin Aletico erawh chuan draw game chiah an mamawh a, first half a Barca tana Alexis Sanchez goal khung chu Atletico tan Diego Goddin chuan a sut a, kum 18 hnua Atletico Madrid-in trophy lian tham an chawi hmasak berna hmel an hmu.

Barca erawh he result vang hian eng trophy mah chawi loin season an khar.

Tun season-ah Barcelona leh Atletico Madrid-te hi vawi khat intum tawhin Barca lam hian Lionel Messi, Luis Suarez leh Neymar-te goal thun chhawr ṭangkaiin 3-1 in Nou Camp-ah Atletico Madrid hi an lo tlawm tawh a ni.

Season hmasaa beisei phak baka che ṭha Atletico Madrid hian quarter final-a Barcelona tum tur hian Real Madrid 4-2 in an hneh (inkhel pahnih belh khawm) a, Madrid khelmualah an fapa rangkachak rawn kir leh Fernando Torres chuan goal hnih a khung a, an phur vanglai tak a ni. An match hnuhnung berah Granada 2-0 in an hneh a, tlar hmaa Torres leh Mandzukic-te inkawp an hlauhawm khawp mai a, Barcelona defence tan chuan he mite pahnih inkawp hi buaipui tham an ni ngei ang.

Barcelona pawh hi tun season-ah boruak neuh neuh neiin an pu Luis Enrique leh an thiampuipa Messi-te inkar a fel lo nia sawi ni chungin an quarter final kalkawngah Elche chu 9-0 in an sawp thei a ni.

Barcelona hian an match hnuhnung berah Messi hattrick chhawr ṭangkaiin 4-0 in Deportivo La Coruna an hneh a, dan pangngaiin Atletico defence tan chuan Messi bawk hi ven uluk ngai leh tur a n ni ang a, hei vanga Suarez leh Neymar-te hi an ngaihthah vaih chuan an tisual khawp ang!

Enrique Vs Simone

1970-a piang coach pahnihte hi tunlai an dinhmun a inang lo hle. Barca enkawltu Enrique hi team chhunga buaina an neihah mawhphurtu ang deuhin media lam chuan an puh a, hman ni deuh khan ban tur ang hialin an sawi hman.

Diego Simone erawh a ropui zual zel a ni ber a, tun hma zawnga an tih hleihtheih loh Real Madrid a hnehpui ta fo mai a, King's Cup-a Real an hneh ṭuma a team a rem khawm danin fak a hlawh viau a, fapa tlanbo midangte duh tawh loh Torres a koh kir vangin an fak lehzual.

Anni pahnih hi player an nihlaiin khelmualah an intawng hman a, pa rorum tak ve ve an ni. Kum 1994-96 chhungin Enrique hi Real Madrid-ah a la awm a, hetihlai hian Simone hi Atletico-ah player a ni a, Madrid derby-ah an intum ṭhin. He mi hnu hian Enrique hi Barcelona-ah a kal a, Simone hi Atletico-ah la awm zelin an inel chho leh bawk a, tunah coach an nih hnuah pawh an inel leh dawn ta a ni.

Zanin Copa Del Rey quarter final inkhel dangah Villarreal-in Getafe dar 12:30 ah an lo mikhual ve thung dawn a ni.