Bangladesh-a Mizo hockey star Zomuana (Jumman Lusai) a thi

Mizo hockey star ropui, Zomuana chu January 18 khan Dhaka, Bangladesh-ah a thi. Bangladesh tana hockey khel thiam hmingthang hi Bangladesh lamah chuan 'Jumman Lusai' (Zomuana Lusei) tiin an ko mai ṭhin a, World Hockey XI-a an lo thlan tawh ngat a ni.

Zomuana thih thu hi Bangladesh chanchinbu­ah an tarlang nasa hle a, "The most celebrated national hockey star Jumman Lusai who has been kept under life-support at Bangabandhu Sheikh Mujib Medical University (BSMMU), finally passed away," tiin chanchinbu pakhat chuan a ziak a; Bangladesh-a hockey player ropui ber ang hiala ngaih a ni.

1978 khan Bangla­desh Police-ah khelin a lâr chho ṭan a, Abhani Limited lamah insawnin 1979 aṭanga hockey a chawlhsan hun 1993 thleng hetah hian a khel a ni. Abhani-ah hian coach a ni zui nghal a, coach hlawhtling tak a ni.

Bangladesh tan a khelh chhungin player langsar ber pawl a ni a, amah hi full back-ah khel ṭhin mah se goal thun thei tak a ni bawk a, 1986-a 2nd Asian Cup Hockey, Dhaka-a khelh a nih ṭumin Iran lamah hattrick a siam a, Bangladesh hockey player zinga inter­national match-a hattrick siam hmasa ber a ni.

Zomuana thih thu hian Bangladesh rama hockey ngainatute a deng chhuak nghal vat a, Bangladesh State Minister for Youth and Sports Biren Sikder MP leh Deputy Minister for Youth and Sports Arif Khan Joy-te chuan he Mizo player hi an ui thu an sawi a; Bangladesh Olympic Association, Bangladesh Hockey Federation, Abahani Limited, Mohammedan Sporting Club, Bangladesh Sports Journalists Association (BSJA), Bangladesh Sports Press Association leh pawl hrang hrangin an ui thu an chhuah a, chanchinbu leh TV lamah pawh a lang nasa hle.