Beisei pha lo Man Utd leh Van Gaal

David Moyes kha a lo che chhe deuh a nih pawhin, player leina sum a hmang vak lo. Louis Van Gaal hi chuan sum tam tak a hmang a, a hnuaiah Manchester United an la khel fuh thei lo - Moyes nen an record a la inang reng!

Sir Alex Ferguson a chawl a, beiseina sang tak nen David Moyes an la a, a hming lemah 'The Chosen One' tiin an vuahsak hial. Beisei ang result a neihpui theih loh avangin kum ruk lai contract an ziahpui kha thla 10 hnu lekah an ban. A thlakna tur an zawng a, 2014 World Cup-a Netherlands semi-final thlenpuitu Louis van Gaal an lalut.

Fans lamin season thar beiseina sang tak nen an thlir a, pre season-ah pawh result ropyi tak tak an nei nghal a; nimahsela Barcelona leh Bayern Munich-te pawh lo enkawl tawhtu hian player manto tak Angel Di Maria, hlawh hnem Radamel Falcao leh midangte a lalut chung pawhin fan-te beisei ang result a pe theilo, eng nge a chhan ni ang?

Formation

LVG hian a formation hman ṭhan 3-5-2 hmangin United hi hlawhtlinpui a tum a, mahse a beisei angin a hlawhtlinpui lo. Inrinnia an Premier League-a Loftus Road-a an khelh ṭumin fans te chuan '4-4-2' formation hmang turin Van Gaal hi an au hial a, second half-ah he formation hi hman a ni a, 2-0 in Queen Park Rangers lakah hnehna an chang.

Van Gaal hian a 3-5-2 formation hi bansan mai a la tum rih lo a, "4-4-2 kan hman khan chance insiam hnem mah ila, lehlam pawl tan chance tam tak kan siam sak ve tho a ni" a la ti fan. 3-5-2 formation chu a la ring tlat.

Di Maria leh a chhehvel

Real Madrid aṭangin beiseina sang tak nen British transfer fee record siamin pound maktaduai 59.7 in Di Maria a lalut.

He player hi Van Gaal hian a chhawr thiam lo nge, Real Madrid-a a khelh ṭhin ang khan a la khel lo.

Man Utd match hnuhnung pahnihah phei chuan striker anga chhawr a ni deuh ber a; Real Madrid leh Argentina tana a khelh ṭhat avanga FIFPRO 2014 World XI-a midfield position-a lang pha Di Maria tan he position a khelh hi a harsa tih a game atangin a lang.

United legend Eric Cantona, David Beckham leh Cristiano Ronaldo-te lo hak tawh ṭhin jersey no.7 an haktir Di Maria hian a theihna tak tak a tilang thei dawn em?? Hunin a hril ang.

Beisei phak lo Falcao

FC Porto, Atletico Madrid leh AS Monaco-ahte a khelh laiin Falcao hi khawvela striker hlauhawm ber pawl a ni. Goal a khung thei a, lehlam defence tan buaipui tham a ni.

Beiseina sang tak nen pound maktaduai 6 lai sengin season khat chhung atan AS Monaco aṭangin loan-in an hawh. Mahse he srtiker hian United tana match 14 a khelah goal thum chiah a la khung. Kar khat a pound 265,000 hlawh petu United hian an duh chuan season tawpah pound maktaduai 43-in lei thei dawn mah se, a lei duh kher ang em?

Defence buaina

Kum rei tak an defender rinrawl lo ni tawh Nemanja Vidic, Patrice Evra leh Rio Ferdinand-te season ṭan hmain an chhuahtir a, anmahni thlak zo tur defender tha an lalut leh si lo a, hei hi Manchester United buaina a ni.

Season ṭan tirah United fans-in an junior team-a khel ṭhin rawlthar Tyler Blackett leh Paddy McNair-te hi hmuh an inbeisei kher lo ang a; nimahsela Sporting Lisbon atanga an lakluh Rojos a inhliam deuh reng a, Chris Smalling, Phil Jones leh Jonny Evans-te pawh a khât tawkin an na bawk a, an buai. Tunah phei chuan midfielder Michael Carrick chu an defender rinrawl ber a ni hrih!

Nipui transfer-a pound maktaduai 156 sengtu United hian Champions League em pawh an khel phak lo a nih leh ngat chuan, LVG leh a player laklu tharte hi kan hmu rei kher lo ang. Hei erawh hria ila, khelh 38 awmna season a ni a, thil hi a la inthlak thei hle a ni.