Italian Football Hall of Fame-ah Ancelotti

Real Madrid manager Carlo Ancelotti chu Italian Football Hall of Fame ah lakluh a ni.

November khan Ancelotti hi Italian Football Hall of Fame ah lakluh a nih tur thu an lo puang tawh a, Thawhṭanni khan Florence ah lakluh a ni ta a ni. Hall of Fame-ah hian Italian coach bakah hian Diego Maradona leh Fabio Cannavaro te pawh lakluh an ni.

Hall of Fame hun hman zawh hian Spain chanchinbu lian Marca chuan Ancelotti a kawm a, Real Madrid chungchanga zawhna chhangin Italian manager chuan, "Real Madrid-ah khawvela player ṭha ber ber an awm khawm a, heng player-te enkawl hi hna awlsam tak a ni. Cristiano Ronaldo hi player danglam bik a ni a, a ni ang player hi an awm lo. Gareth Bale hi Ronaldo ang tho a professional a ni bawk," tiin a club enkawl mek chu a fak.

Tunge Ancelotti?

Kum 55-a upa Ancelotti hian a inkhelh hun laiin Italy tan vawi 26 a inlan a, 1990 World Cup khan Italy team-ah a tel nghe nghe. Kum 1976 khan Parma youth team tan a khel ṭan a, kum thum hnuah Roma a zawm a, Stadio Olimpico-ah kum riat a cham. Roma ṭang hian AC Milan a zawm leh a, Milan tan kum nga a khelh hnuin football khelh a chawlhsan.

Ancelotti hian football khelh a chawlhsan hnuah khawvela club lian ber ber a enkawl a; Parma-ah bul ṭanin, Juventus, AC Milan, Chelsea, Paris St Germain leh Real Madrid te chu a team enkawl tawh te an ni. Ancelotti chuan a lawmthu sawina atan 1990 World Cup a a Italy jersey chu Italian Football Museum-ah a pek tur thu a twitter account kaltlangin a puang bawk.