Goodison Park-ah goal a lut lo
Everton tana penalty pet ṭhin chu Leighton Baines a ni. Thawhṭanni zanah Baines aiah Kevin Mirallas a pen chhuak a, a hlah avangin Everton leh West Brom goal awm loin an inhnehtawk. Toffees hian league match hnuhnung parukah chak an nei lo.
Season liam ta kan thlir kir a nih chuan Everton hi tun ang hunah chuan Champions League khel thei dinhmunah an ding ang. Tunah erawh European competition lam aiin relegation battle-ah an tel dawn niin a lang. Roberto Martinez-a enkawl Everton hian vawi 22 khelhah point 23 an hmu a, 20-naa awm Leicester City nena an inthlauhna hi point ruk chauh a ni.
Everton starting eleven-ah FA Cup-a West Ham an hneh loh ṭuma khel ṭha tak Mirallas chu hrem vanga khel thei lo Aiden McGeady aiah telh a ni. Belgian winger hian inkhelh
ṭan tirah chance a nei a, yard 25 aṭanga a ball pet chu West Brom keeper Ben Foster zawnah tak a kal. Mual neitu Everton hian inkhel an thunun a, amaherawhchu an chungnungna chu goal-ah an chantir thei lo.
First half tawp hma hretin West Brom defender Joleon Lescott-a'n a kut hmanga ball a khawih avangin Everton-in penalty an hmu a; Mirallas-a'n goal ban a pet per a, a goal loh takah chuan sawi zui a hlawh hle.
Penalty specialist Baines hian a career-a vawi 16 a pet tawhah vawi 15 a pet goal a, Mirallas hi chuhhelh vanga petah an ngai a, ngaih ṭhat lohna tur belhchhah nan Belgium winger aiah Bryan Oviedo luhtir a ni.
Second half ṭantirh lamah West Brom an khel ṭha a, striker Saido Berahino-a'n Everton defender tan harsatna a siam a, keeper Joel Robles erawh a buai hran lo. Hun tawp lamah Everton-in Lukaku hmangin chance an nei a, Belgian forward hian goal zawnah a pet lo.
West Brom an ṭang tluan a, goal awm loin inkhel a tawp. Mikhual team West Brom hian coach Tony Pulis hnuaiah hneh loh an la tawng lo a, point 22 hmuin table-ah 14-naah an awm mek.
Eng nge an sawi?
West Brom head coach Tony Pulis chuan, "Hmasawnna tur tam tak ka nei a, Premier League khel zel turin rang taka hmasawn kan mamawh a ni. Kan beisei ang game kan la khel thei lo a, chutihrualin player-te inpekna leh tumruhna erawh a fakawm hle," tiin a sawi.
Inkhelh banah Roberto Martinez a insawifiah a, Everton boss chuan, "Mirallas kha a penalty hlah vanga thlak ka ni lo, a malpui dinhmun kha a chiang lo a. Inhliam thei a nih avangin kan thlak ta a ni," tiin a sawi.
Penatly chungchang sawi zuiin, "Penalty kan hlah avangin point thum kan hloh a ni. Leighton hi kan penalty pettu pangngai a ni a, chutihrualin kan squad-ah hian penalty pet thei kan kawl nual a ni. Pet goal se chuan sawi zui tur a awm lo ang, a goal loh takah chuan sawi zui a ṭul ta a ni," a ti.