Australian Open 2015 Player langsar an chak zel

Australian Open-ah champion lai Stanislas Wawrinka chuan a title humhim tura a kalkawng hmasa berah Turkish player Marsel Ilhan chu 6-1, 6-4, 6-2 in a hneh. Marsel Ilhan hi world number 100-na a ni a, Turkish tennis player zinga world no. 100 huangchhung hauh thei awmchhun a ni. Wawrinka hian second round ah hian M Copil emaw P Andujar a tum ang.

Seeded palina Wawrinka chuan, "Grand Slam tournament first round khelh hi a awlsam ngai lo, theihtawp ka chhuah ṭhin reng a ni. Court a ka chetdan kha ka lungawi a, inrintawkna sang tak nen ka khingpui apiang te ka hmachhawn zel dawn a ni," a ti.

Australian Open a vawi li champion tawh world no. 1 Novak Djokovic chuan Rod Laver Arena-ah a khingpui Alijaz Bedene a tlawm a. Djokovic hian world no. 116-na Alijaz hi 6-3, 6-2, 6-4 in a hneh a, second round-ah Andrey Kuznetsov emaw Albert Ramos emaw a tum dawn a ni. Champion rinkai Djokovic hian nikum quaterfinal khan Swiss player champion zui ta Wawrinka lakah a tlawm.

Grand Slam title vawi 18-na lak beisei a Melbourne pan Roger Federer chuan a match hmasa berah a khingpui a hneh nghal a. Brisbane International final-a a game vawi 1000 chak hnu a game a khelh leh hmasa berah world no. 2 Federer hian first round-ah Taiwanese player Yen Hsun Lu chu 6-4 6-2 7-5 in a hneh. Second round-ah Italian player Simone Bolelli a tum ang.

Inkhel chungchang sawiin Federer chuan, "Khawng takin Hsun Lu khan match a khel a, chak turin insiamrem fe a ngai a, inthlahdahna hlek pawh a thiang lo. Amah hi ka lo khelhpui tawh ṭhin a, theihna sang tak a nei tih ka hria. First round khelh hi chu harsa kan ti tlangpui, mahse ka khelh danah ka lungawi khawp mai," a ti. Federer hian Australian Open-ah title vawi li a la tawh a, a champion loh ṭum pawhin first round ah hi chuan a la chak lo ngai lo a ni.

Seeded ngana Japanese Kei Nishikori chuan a match hmasa berah Spanish player Nicolas Almagro straight set in a hneh. Nikuma US Open finalist Nishikori hian 6-4, 7-6(7/1), 6-2 in darkar 2 leh minute 7 hnuah Nicolas hi a tlawm a, second round ah Croatian player Ivan Dodig emaw Brazilian Joao Souza emaw a tum ang. Nishikori chuan "Nicolas ka tum dawn hian first round harsa taka paltlang a ngai tih ka hre lawk a. A chet ṭhat em avangin second set-ah khan ka talbuai hman hial a ni. Third set a ka insiamṭha hman kha ka chakna kawnga pawimawh tak a ni," tiin a sawi. Japanese player Nishikori hi Australian Open-ah a la champion ngai lo a, a thlen san ber kum chu 2012 kha ni a, quarterfinal-ah a chak lo.

Hmeichhe lamah world no. 2 Maria Sharapova chuan second round a lut fel a, first round-ah Croatian player Petra Martic a hneh. Brisbane International title la a kum bul ṭan Sharapova hi Rod Laver Arena ah 6-4, 6-1 in a chak a ni, a match dawtah Russian player Alexandra Panova a tum ang.

Nikum khan Sharapova hian Grand Slam inelna pathum - Australian Open, Wimbledon leh US Open-ah te fourth round a thleng a; French Open-ah a champion bawk. Russian tennis star chuan "Kuminah title lak ngei ka duh a, nikumah fourth round ka thleng a, chu chu ka result beisei a ni lo. Melbourne-ah hian title la turin theihtawp ka chhuah ang," a ti.

Thawhlehni khan Melbourne a title lak tumin khawvela hmeichhe tennis thiam ber ni mek Serena Williams first round-ah a inlan a; Margaret Court Arena-a Retractable roof vuah thar hnuaiah Belgium star Alison Van Uytvanck a hneh. Williams leh Uytvanck te hi an vawi khat intawnna a ni.

Williams hian Grand Slam title 18 a la tawh a, Australian Open-ah hian ṭum nga a champion tawh. Inkhelh banah Williams chuan chuan, "Tumahin chak lo nih kan duh lo. Mipuiin hma kan sawn em tih min ngaihchan reng avangin pressure a sang a, camera in min la a, court chhunga mi zawng zawngin min en bawk si a," tiin first round khelh harsat thu a sawi. Williams hian second round-ah a Ons Jabeur hnehtu Vera Zvonareva a hmachhawn ang.