Chawhnu dar 1:30-ah MPL U17 Final

Mizoram Premier League Under 17-ah champion thar kan hmu dawn. Vawiin chawhnu dar 1:30 hian Dinthar FC U17 leh Mizoran Police U17 te'n final an khel ang.

MPL U17-ah Chanmari FC-in final ṭum hnihah Dinthar FC ve ve hnehin an champion. Season 3-ah erawh Dinthar FC leh Chanmari FC te semifinal-ah an inhmachhawn a, Dinthar FC-in an elpui Chanmari FC 4-2 in an hneh. Final-a Dinthar hmachhawn tur Mizoram Police hian MPL U17-ah groupstage an la paltlang vek a, final erawh an vawi khat luhna a ni.

Goal 50?

MPL U17 khelh mekah hian goal 46 a lut tawh a, goal 50 tling turin goal li dang a la ngai. Dinthar FC forward Lalawmpuia'n goal a la khung tam ber a, goal nga a khung tawh - top scorer turin a dinhmun a ṭha hle. Chutihrualin Chanmari FC forward Lalṭhasiama'n goal nga ve tho a khung.

MPL U17-a Chanmari FC champion pui tawhtu Lalhmachhuana'n season 3-ah Dinthar FC tan a inlan a, a club thar hi final hruai thlengin goal thum a khung tawhin top scorer nih theihna chance a la nei ve bawk.

MPL U17 Season 3-ah hian kum dang ang bawkin top scorer leh best player bakah position tinah player ṭha ber thlan tur a ni.

Final Kalkawng

Group stage-ah final khel tur team pahnih hi pahnihna ve ve an ni. Mizoram Police FC-in Chanmari FC an ngam lo a, amaherawhchu Chanmari West FC chiang taka hnehin groupstage an paltlang. Semifinal-ah Police hian Aizawl FC an barakhaih a, champion rinkai an hneh avangin champion thei an ni tih a chiang.

Dinthar FC-in groupstage-ah harsatna nei loin Reitlang FC leh Bethlehem VT FC an hneh a. Group hmahruaitu zawnna inkhelah Aizawl FC an hneh lo. Semifinal-ah Dinthar FC hian Chanmari FC 4-2 in an hneh a, MPL U17-a Dinthar-in Chanmari FC an hneh vawi khatna a ni.

Final thlirlawkna

Dinthar hian MPL-a tawnhriat nei player pathum an kawl a; Francis Ramdinmawia, Calvin Hmar leh Lalawmpuia te hi player pawimawh vek an ni. Amaherawhchu, final-ah captain Vanlalhriata Sailo chu semifinal-a hnawhchhuah a nih avangin an chhawr thei dawn lo a, a hmunruak hnawhkhah kawngah Apuia leh Mapuia an pawimawh ang.

Mizoram Police-in player hman thiam an nei a, chhawr rim bik an nei. Final-a khel tur player 11-te hi an chau lo a nih rau rau chuan an khelh ho tam tawh an khirh tawh khawp ang.

Police tlar hnung a phui a ṭha a, Aizawl FC lakah goal an chhuah lo. Hei vang hian tlar hnunga Saidingliana leh Lalramchhuana te inkawp an pawimawh leh ang. Champion tur chuan goal khung an mamawh a, tlar hmaa Roluahpuia leh James Lalhlunsanga te inkawp an pawimawh dawn.

Eng nge an sawi?

Dinthar FC manager Lalnuntluanga chuan, "Mizoram Police inkhel hi ka la thlir loh avangin an chungchang han sawi lawk theih ka nei lo. MPL U17-ah record ṭha tak kan nei a, final kan la thleng vek. Tun ṭumah hian kan champion ngei ka beisei," tiin a sawi.

Dinthar manager chuan sawi chhunzawmin, "Final kan theih theihna chhan hi kan coaching staff Ngaiha (C. Lalngaihawma) leh Martyn Ralte te bakah Under 17 committee te thawhrimna ran a ni. Min sponsor-tu NEXTCOMM leh Siam Siam Drug Store te chungah kan lawm takzet bawk," tiin a sawi.

Mizoram Police coach Lalramhluna chuan, "Dinthar hi kan huphurh lo a, a vannei zawk zawk chak turah kan inngai a, Pathian thu thuah kan indah. Aizawl FC kan khelh anga kan khel thei a nih chuan kan champion ngei ka ring. Aizawl FC kha ngam lo tura kan ngaih a ni a, result chu eng pawh nise Dinthar hi chu a hahdam zawk turah kan ngai," tiin a sawi.