National Games 2015-a tel tur Mizo infiammite inbuatsaih ngawrh

India ram infiammite intawh khawmna lian ber, 35th National Games chu January 31 - 14 February chhung hian Kerala chuan a thleng dawn a, Mizoram aṭangin infiammi 54 an tel dawn. Infiamna chi hrang (discipline) chi sarihah an tel ang. National games chinah hi chuan a duh apiang tel theih a ni lo a, national level inelnaa che ṭha chin chiah koh an ni ṭhin.

Kuminah hian Mizoram State Olympic Association hnuaiah infiamna pasarih - Archery, Boxing, Football (mipa), Taekowndo, Table Tennis, Shooting leh Weightlifting-ah Mizoramin infiammi a tir dawn a ni.

Mizoram State Olympic Association ruahman angin sports association hrang hrangte chuan kum hlui December aṭang khan training hi an nei ṭan a, infiamna ṭhenkhatah chuan riak lutin an inbuatsaih.

Table tennis-a Mizoram aiawh turte chu tunah hian ram pawnah training-in an awm tawh a, anni hi national championship khelin tun hnaiah an zin chhuak a, chuta ṭang chuan Mizoramah kir tawh loin Bangalore lamah training hi an nei zui ta a ni. TT-ah hian senior national championship-a pariatna chin tel theih a ni a, Mizoram hi 10-na a ni chungin an chunga awm team pahnihte an tel theih loh zarzoin National Games an khel thei dawn a; Mizo player hmun danga TT zira awmte he team-ah hian an tel theih dawn avangin Mizoram hian beisei an nei sang hle.

Taekwondo lamah hmeichhe team chiah an tling a, weightlifting-ah hmeichhe pakhat a qualify bawk. Boxing lam hi India rama boxing enkawltu an buai avangin tute nge khel dawn an tichiang thei lawk lo a, Mizoram hmeichhe team an qualify hnuah tun hnai khan Mizoram mipa team pawh khel thei tura thlan zingah an rawn telh leh hnuhhnawh bawk.

Shooting lam hi India ram a sanna a nih vangin National Games-a medal lak hi thil huphurhawm tak a ni a; nimahsela training an ulukin an nei rei tawha , medal dawng thei an ni ve tho.

Football pawh nikum kum tawp aṭangin training an nei ṭan tawh a, anni hi Group B-ah awmin West Bengal, Punjab leh Services-te nen an awmho a, India ram football-a record nei ṭha ṭhah an awmpui dawn a ni.