Coca Cola Cup-ah Mizoram-in Maharashtra hneh

Larry Lalrinawma hattrick chhawrin Mizo­ram chuan Maharashtra chu 3-2 in an hneh a, Coca Cola Cup National Sub Junior Football Championship-a semi final lut turin an dinhmun an siam ṭha zel.

Nimina Goa-a inkhel­ah hian Maharashtra-in a tir leh a tawpah goal an thun a, he mi inkarah hian Lengpui naupang Larry hian goal thum a thun. Mizoram hian naktukah Kerala an tum leh dawn a, a chak zawk zawkin semi final an lut dawn a ni.

Maharashtra hian goal an khung hmasa a, minute 5-na lekah an thun nghal mai a, hei hi Larry hian minute 34-naah a sût. Second half a ni a, minute 54-na leh minute 69-naah Larry bawk hian a thun leh a, Mizoram-in 3-1 in hma an hruai. Hun tawp dawn ṭep minute li chiah awm tawhah Maharashtra hian an rawn thun ve leh a, hei hian inkhel a tidanglam phak ta chuang lo a ni.

Larry hi Mizoram Football Association buatsaih Inter District Coca Cola Cup-ah pawh top scorer niin goal ruk a lo thun tawh a, final-ah goal hnih a thun nghe nghe a, he intihsiakah hian best player-a thlan a ni bawk. Khawhai khaw chhuak niin tun hnaiah a pa hnathawhna avangin Lengpuiah an pêm a, naupang hmabak nei êng tak a ni.

Team enkawltute thu

Mizoram team en­kawltute chuan an tournament khelh chhoh danah hma an sawn zel tih an sawi a, chutih rualin pumruaa an inthlauh deuh ṭhin avangin an khingpuite tharumah an hneh lo thei hle tih an sawi.

Manager Hmingsanga chuan, "Kan khelh fuhlaia kan ball inpe kual vel chu hmuhnawm tham a tling a; nimahsela tharuma min nawrin kan hneh ngang lo ṭhin a ni. Zêp tur chi pawh a ni lo a, kan khingpuite nen hian kan inrual lo a ang kan ti a, kum bithliah fel sa veka inkhel ni mah ila a naupang leh upa deuh chu kan awm chiang a, keini lam hi chu MFA lamin kum dik chiah thlan tur a tih angin naupang te te kan ni a, a ṭhente chu kum 12-13 lekte an ni," tiin a sawi.

Mizoram hian Jharkhand tum hmasa berin 2-3 in an hneh lo a, Haryana 1-0 in an hneh a, Maharashtra 3-2 in an hneh leh a, Kerala an la tum leh ang. Kerala hi Maharashtra nen 5-5 a lo inhnehtawk tawh team an ni a, team chhe lo tak an ni.

Mizoram team enkawltute chuan, "Kan tiatpui ni lo mah se kan rualpui vek khel ni ta ila min tluk tur an awm kher lo ang. Hun rei tak kan inbuatsaih a, player-te pawh an inman a, an ṭang thei em em a, an chhuanawm khawp mai... kan tlarhnung erawh a pawp leh ṭhin a, insiam ṭhat zel kan tum dawn a, kan theihna zawng zawngin kan khel zel ang," tiin Vanglaini an hrilh.