Liverpool leh Chelsea an inhnehtawk
Anfield-ah goal khung hmasa zawk Chelsea an him hram a, Capital One Cup semifinal leg 1-ah mual neitu Liverpool nen 1-1 in an inhnehtawk. January 27-ah second leg khelh a ni ang a, chumi hunah chuan chak zawk an awm tawh ang.
Thawhlehni zan inkhelhah Chelsea-in minute 18-naa Eden Hazard penalty hmangin hma an hruai a, Liverpool-in Raheem Sterling hmangin an siphurh an sut. Minute 59-naa Sterling goal khung hi a ropui a, ama thawhrah liau liau a ni.
Kartawpah Chelsea-in Premier League-ah Swansea City 5-0 in an sawp a, khami ṭuma an starting eleven aṭang khan Jose Mourinho-a'n player pahnih a ti danglam. Keeper tawnhriat ngah Petr Cech aiah Thibaut Courtois a inlan a, Brazilian midfielder ball thiam Oscar aiah tlar hnung veng thiam zawk John Obi Mikel a luh tir bawk.
Liverpool-in Aston Villa an hneh ṭumin captain Steven Gerrard an awl tir a, Chelsea hmachhawn tur zingah erawh Gerrard a tel a, Fabio Borini aiah season thara LA Galaxy zawm tur English midfielder hi a lut.
Inkhel chu
Liverpool-in bul an ṭan ṭha a, minute 16-naah Gerrard-a'n yard 30 aṭangin kawh takin a pet a, keeper Courtois-a'n a dan sak. Mualneitu lam an chesual a, Emre Can-a'n box chhunga ṭul lo taka Hazard a tih tluk avangin penalty a chawi. Belgium forward hian a penalty hlawhchhuah hi a pet nghal a, a hnampui Mignolet bumin minute 18-naah Chelsea hmahruaina goal a khung.
Liverpool-in an siphurh sut tumin an nawr chhunzawm a, an goal bawh na mah se goal an khung thei lawk lo. Second half ṭan aṭanga minute 14-naah Sterling-a'n player danglam a nih zaa a pho lang a, English midifielder hian Jordan Henderson-a pass naran tak chu Nemanja Matic bum nan a hmang a, Gary Cahill tihbuai hman lo khawpa rangin penalty area-ah ball a la lut chhunzawm a, keeper Courtois dan rual loin Sterling hian Liverpool goal khatna a a khung.
Sterling-a goal hian Liverpool inrintawkna a pe a, captain Gerrard-a'n a ke vei lamin goal ban a pet per a, Chelsea an vannei zel. Liverpool-in goal hlauawm an nei chhunzawm a, keeper Courtois-a'n goal dang a chhuah tawh lo. Belgium keeper hian Philippe Coutinho, Jordan Henderson, Sterling leh Gerrard thlaktu Adam Lallana te goal khung tur dan sakin Chelsea a chhanhim.
Liverpool hian ball an chang tam zawk a, goal attempt pawh vawi 19 zet an nei a, goal zawnah vawi ruk an pet bawk. Chelsea erawhin goal attempt vawi hnih chiah an nei a, penalty aṭanga goal an khung bak goal zawnah an pet lo. Chelsea forward Diego Costa-a'n Liverpool tlar hnung a tibuai lo a, inkhelh chhung zawnga a lansarh berna chu anmahni penalty area-ah a kutin ball a khawih a, penalty a chawi lo hlauh.
Liverpool-in an khelmualah inkhel thunun chungin an chak zo lo a, minute 90 chhung an hman ṭhat tawk loh avangin Wembley Stadium thleng turin Stamford Bridge-ah Chelsea an hneh a ṭul dawn, a harsa khawp ang.
Eng nge an sawi?
Chelsea manager Jose Mourinho chuan, "Liverpool kha an khel ṭha a, an khelh dan thlir khan chak lo tur an ni lo, draw kha result awm tak a ni. Amaherawhchu inkhel thununtu zawk kan ni a, passing kha uluk leh hret ilang chuan goal kan khung ngei ang," tiin a sawi.
Portuguese manager chuan sawi chhunzawmin, "Semifinal hmasa zawkah kan inhnehtawk a, second leg hi Stamford Bridge-a khelh tur a ni. Kan dinhmun a ṭha zawk tih ka sawi lo a, Stamford Bridge-a chak zawk zawkin final an lut ang. Mi tam takin League Cup hi an ngai hlu tawk lo ṭhin a, keini leh Liverpool hi chuan kan ngai pawimawh a ni," tiin final thleng tura theihtawp an chhuah tur thu a sawi.
Liverpool manager Brendan Rodgers chuan, "Kan khelh danah ka lawm a, kan result erawh pawm har ka ti. Chak kan phu zawkin ka hria, goal kan phur hmasak hnuah kan huaisenna lantirin chak phu khawpin kan khel a ni," tiin a sawi.
Khelh hmabak chungchang sawi chhunzawmin Liverpool boss chuan, "An khelmualah kan khel tawh dawn a, game in hawng zawk an khelh tawh ngei ka ring. Final luh turin chance ṭha tak kan nei a, theihtawp kan chhuah chhunzawm zel ang," tiin a sawi.