Hmasawn zel duh Mancini

Inter Milan coach thar Roberto Mancini chuan season thara Champions League khelh phak ngei a tum thu a sawi.

November thla khan Mancini hian Walter Mazzarri thlakin a club hlui Inter Milan enkawl hna a thawk ṭan a, tunah hian Inter hi table-ah pakuanaah awm mek.

Tun hnaiah Serie A a tlak hniam avangin Italian club pathum chiahin Champions League an khel pha a, Inter hian pathumnaa awm Napoli point sarihin an la pha lo.

Manchester City boss hlui Mancini chuan, "Champion chu kan tum tur a ni a, chumi hma chuan Champions League khelh phak kan tum phawt a ṭul a ni. Kan elpui Milan chunga kan awm hi a ṭha a, chutihrualin season tawpah pathumnaah tal kan awm a ṭul a ni," tiin European competition a tel ngei a tum thu a sawi.

Italian manager chuan sawi chhunzawmin, " Massimiliano Allegri kaihhruaina hnuaiah Juventus an khel ṭha a, an champion ngei an rinawm. Ani elpui pha tur chu Roma an ni," a ti.