Dortmund tana rinawm Mats Hummels

Europe club lian ten an rim rawn Mats Hummels chuan Borussia Dortmund a chhuahsan dawn loh thu a sawi.

Borussia Dortmund hi tun season-ah an che chhe hle a, tunah hian Bundesliga-ah a hniam ber dawttu niin 17-naah an awm mek. He ti chung hian captain Hummels chuan Dortmund chhuahsan tumna rilru a put loh thu sawiin, amah beiseitu Arsenal leh Manchester United beiseina a thai bosak.

Season thara Cham­pions League khelh a beiseiawm loh vanga Signal Iduna Park chhuahsan tur anga an sawi German International defender chuan Champions League khel pha tura beih chu an tan a harsat tawh thu sawiin, a ngaihtuahnaah pawh a awm loh thu a sawi a; amaherawhchu Champions League khel lo pawha a club-a awm zel a tum.

Thu lengvak a tam thin thu sawiin thu lengvak vela a inhambuai loh thu a sawi a, "Champions League khelh kher hi ka hlimna tur atan ka mamawh lo," a ti.