Defoe an Sunderland a ringtawk

Sunderland player lakluh thar Jermain Defoe chuan a club thar Sunderland chuan Premiere League a la cham zel turin theihna an nei a ni a ti.

Major League Soccer team Toronto Fc atanga Sunderland in an lakluh Defoe hian Stadium of Light ah kum thum leh a chanve cham turin contract a sign a, Sunderland kawr ha chunga a match hmasa berah a team hlui Tottenham Hotspurs tumin 1-2 in White Hart Lane ah hian an tlawm nghal. He result hi Gus Poyet a nau te'n tunhnai match nga an khelha vawi li an chaklohna a ni tawh a ni.

Sunderland hi relegation zone ah awm chiah lo mahse, relegation zone atanga an himna hi goal difference ah chiah a ni. Mahse, hei hian England tan a match 55 khela goal 19 thun thei Defoe a ti hnual ve mai lo, "Kan match pumpui thlirin kan khel tha hle in ka hria, White Hart Lane ah hi chuan mikhual team tan chet a harsa thin a, mahse, keini chuan point hlawhchhuah phu khawpin kan khel tha a, kan vanduai mai zawk a ni" a ti. Premiere League a West Ham, Tottenham Hostspurs leh Portsmouth tana an goal thunkhawl lo ni tawh thin Defoe chuan ''Spurs kan tum tuma kan khelh dan anga kan khelh reng theih chuan point kan la hlawhchhuak ngei dawn a, ka thiante leh kei ngei pawhin goal tam tak kan la thun ka beisei a ni'' a ti.