Luis Enrique hmalam hun a chiang lo

Barcelona Coach Luis Enrique chuan season thara Barcelona coach a nih dawn leh dawn loh thu ah engmah thuchiang ala sawi duh rih lo.

Player a nih laia Spain a team inhal ber ang hiala an sawi ṭhin Barcelona leh Real Madrid tana khel kawp pha ngat, game 500 a goal 100 zun thei Luis Enrique chuan Barcelona a a hmalam hunin a tihbuai loh thu sawiin, 'tun hun' hi a tan chuan a pawimawh ber thu a sawi.

Nikum season tan dawna Nou Camp alo luh atang khan Luis Enrique hi Barca ah hian a tlatlum lo nghal hle a, a players leh fans te thlawpna a hmu thalo hle ni a sawi a ni.

Roma te pawh lo enkawl tawh thin Luis Enrique hian a team te hnen atanga a duh ang thawhpuina a hmu lo a nih chuan chhuah mai a hnial loh thu a lo sawi tawh nghe nghe.

Luis Enrique hi Barcelona a an star player Lionel Messi nen an boruak tha lo ang a sawi a ni reng a, La Liga an game hnuhnung bera Deportivo La Coruna 4-0 a an hneh tuma Messi hattrick lawmpui lo ang a sawi anihna chuan he boruak hi a chhem alh nasa lehzual a ni.

Mahse, he thu hi pha in Luis Enrique chuan ''Goal celebrate chiam chiam loh hi ka tihdan a ni ve hrim hrim a, goal kan khung vang chuan ka lawm ngei a, mahse, tun hma pawn goal kan khungin ka lawm vak ngai lem lo, ka awmdan ngai rengin ka awm ṭhin" tiin an goal chu Ballon D'Or vawi li lai lo dawng tawh Lionel Messi thun a nih vanga lawm lo anih loh thu a sawi.