Player an chhuak lo ang - Pochettino

Tottenham coach Mauricio Pochettino chuan January transfer-ah a player-te chhuah a phal dawn lo.

Transfer hun lai a ni a, player chhuak tura sawi thawm a tam a, Tottenham player an bang bik lo. Spanish forward Roberto Soldado bakah Kyle Naughton, Emmanuel Adebayor leh Aaron Lennon te chhuak tura sawi thawm awm mah se Argentine coach Pochettino chuan a player-te zingah zawrhlai an awm loh thu a sawi.

Spurs boss Pochettino chuan, "Player zingah zawrhlai an awm lo tih ka sawi duh a, an zavaiin squad-ah an nghet a ni. Minti lawmtu chu team ṭha leh inlungrual tak coach ka ni thei hi a ni. Soldado lakah hian ka lungawi em em a, kan zinga awm turin ka duh takzet a ni a, inelna hrang hrang kan hmachhawn turah tun ang a team nghet leh inthurual hi ka mamawh zawng tak a ni," tiin a sawi.

Soldado hi German club Bayer Leverkusen nen sawi zawm a ni. Leverkusen hian an striker Josip Drmic chu an hmelma Hamburg laka an chan a rinawm avangin Spanish forward hi an ngaihven hle. An sawi zel dan chuan Spurs hian Soldado an chan a nih chuan Everton winger Kevin Mirallas an la dawn tih thuthang a awm mek bawk.

Pochettino hian a player-te chelh a tum thu hi ṭum tak a sawi a, amaherawhchu transfer lai a nih miau avangin manager thusawi pawh hi a dik lo thei bawk. Spurs hian Capital One Cup, FA Cup leh UEFA Europa League-ah champion beiseina an la nei vek a, Premier League-ah paruknaah an awm mek bawk.