MPL U 17-ah Mizoram Police an champion

Player pasarih ve vein penalty an pet hnuah Mizoram Police FC chuan Dinthar FC chu 6-5 in an hneh a, Mizoram Premier League season 3 Under 17 champion an ni ta.

Nimina final inkhelah Mizoram Police leh Dinthar FC chu hun pangngaiah goal inpe loin an inhnehtawk a, extra time-ah goal khat ve ve an khung. Penalty shootout hmangin chak zawk an zawng a, panga ve ve an pet zawhah 4-4 a ni a, sudden death-ah Mizoram Police FC rawltharte 6-5 in an chak ta a ni.

Inkhelh hma chanchin

Dinthar FC hi MPL Under 17-a season hnih a zawna final thleng tawh an ni. Anni hian seminfinal-ah a kum zawna final-a an hneh loh Chanmari FC an hneh a, 4-2 ngawtin an chak thei. Dinthar FC hi MPL Under 17-ah bik chuan final boruak chhim tawh an ni a, final-a talbuai lo deuh tura ngaih an ni.

Mizoram Police FC hi hun rei tak Mizoram football thununtu an ni a; nimahsela MPL din a nih hnuah senior-ah leh Under 17-ah an la champion lo. Senior lamah chuan player thar an neih loh avangin an buai a, Under 17 lamah erawh player nghet nei loa a thar zel an lak avangin an buai niin a lang. Final an vawi khat khelhna tur a ni.

Inkhel an ṭan ta e

Rawlthar inkhel an ni a, inngam taka goal bawh buan buan tura beisei an nihlaiin fim karin an khel! Mahni goal venhim an dah pawimawh ve ve a, tawngpawng nawr an tum lo a, inkhel an tihmuhnawm loh phah hial niin a lang.

Goal luh lohna first half-ah Mizoram Police-in ṭum hnih chu goal an khung teuh hle a, Dinthar FC lam pawhin goal hlauhawm chu an nei ve tho a, 'clear chance' erawh an hmu lo.

Second half a ni a, Dinthar FC-in penalty an hmu. An player ṭha leh MPL pangngaiah pawh inlan zeuh zeuh ṭhin Lalawmpuia'n a pet a, goal ban a pet per a, Mizoram Police an him. He mi hnu hian Mizoram Police lamin Dinthar FC goal bar an tihper ve thung a, an inbeitawk hle. Minute 90 a zo a, goal a lut lo.

Extra time an khel a, Mizoram Police tan Lalmawizuala'n vei lama kila ball a kalpui chu minute 113-naah kil tak maiah a pet goal a, Dinthar FC keeper tan dan harsa niin a lang lo a, a dang miau si lo a, 1-0 a ni. Hun a tawp dawn tawh a, minute 118-naah Dinthar FC lamin an si phurh an sût a, Lalrozuala'n hnai set sawtah goal a thun a, 1-1 a ni a, minute 120 a zo.

Penalty hmuhnawm

Penalty hi chu 'ṭhumvawr' a ni tawh ṭhin a, chak zawk tur sawi lawk theih a ni lo. Mizoram Police-in an penalty vawi hnihna an hlah a, Dinthar-in vawi li petah 4-3 in hma an hruai.

A vawi ngana an pet ta a, Dinthar player-in pet goal se an chak ni tawh mai tur chu Mizoram Police keeper Vannunmawia chuan a dang hlauh mai a, 4-3 a la ni zel. Penalty hnuhnung ber pettu tan pet goal ngei a la ngai a, hei hi pet goal-in vawi nga pet zawh hnuah 4-4 a ni.

Sudden death hmangin chak zawk an zawng ta. Vawi khat ve ve an pet goal hnuah Police keeper Vannunmawia'n vawi khat a dang leh a, he mi hnu hian Police lamin thun belhin 6-5 in an chak ta a ni.

Mizoram Police FC Under 17 boss Lalram­hluna chuan, "Kan lawm khawp mai. Nikum aṭangin ngawrh takin kan inbuatsaih a, chumi rah chu kan seng ta a ni. Chutihlaiin kan player ṭhenkhat hi thingtlanga mite an ni a, Krismas hmanga an haw an lo kir theih lawk loh avangin duh angin kum bulah training kan nei tam hman lo... kan champion hi kan lawm takzet a ni," a ti a, Mizoram Police-a an hotute chungah lawmthu a sawi bawk.

Mizoram Police hi coaching staff Ramhluna, Laltuakliana leh Zira-te enkawl a ni a, 1st MAP Football Academy naupangte an ni hlawm a, kum tin batch thar an nei deuh zel a ni.

Lawmman leh chawimawina

Age group level-ah hian MPL Board lam chuan prize money hi a hranpain a siam ngai lo a, chutih rualin inbuatsaihna senso tur leh thil danga hman tur match money erawh a siam ṭhin.

MPL Under 17 khel zawng zawngte hian Rs 5,000 inbuatsaihna atan an dawng ṭheuh a ni. Group match-ah chak zawkin Rs 1,500 zel dawngin a chak loin Rs 800 zel an dawng. Semi final-ah a chak zawkin Rs 2,000 dawng zelin a chak loin Rs 1,500 an dawng leh a; final-a chak zawkin match money Rs 3,500 an dawng a, chak loin Rs 2,000 an dawng bawk a ni.

Position tinah player khel ṭha ber thlan

chhuah an ni a, a pumpuia player ṭha bera thlan chu Ramhlun South rawlthar, Lalawmpuia, Dinthar FC a ni.