Barcelona leh Villareal an chak

Copa del Rey quarterfinal first leg-ah Barcelona leh Villareal te'n hun tawp dawna goal hmangin an khingpui Atletico Madrid leh Getafe 1-0 ve ve in an hneh a, second leg hi karleh lama khelh tur a ni.

Nilaini zan inkhelah Lionel Messi-a'n Barcelona goal awmchhun a khung a, minute 85-naah Argentine forward penalty pet chu Atletico keeper Jan Oblak-a'n dang mah se a per leh erawh a tisual nawn tawh lo. Nou Camp-ah Barcelona 1-0 in an chak. Villareal pawhin hun tawp hma minute ngaah tho chakna goal an khung a, Getafe laka goal khungtu hi Bruno a ni.

Nou Camp-ah chuan...

Copa del Rey quarter final khelh hma ni 10 liam ta khan La Liga inkhelah Barcelona hian an khelmualah Atletico Madrid hi 3-1 in an hneh.

Nilaini zanah Barca-in chance an nei hmasa zawk a, minute 10 chhung lekin Neymar hmangin goal khung theihna hun ṭha an nei a, Brazilian forward hian a hlah. Atletico an zam bik lo a, Antoine Griezmann nena inkawp Fernando Torres ball pet chu Barca defender Gerard Pique-a'n a lo khawih per hman a. Vei lam aṭanga Guilherme Siqueira cross chu Griezmann tan a sang hret bawk.

First half-a chance ṭha ber erawh Luis Suarez hlah a ni. Croatian midfielder Ivan Rakitic-a ball pass ṭha chu Uruguayan forward hian keeper chauh hmachhawn nachungin goal zawnah a pet lo.

Second half-ah Torres aiah Mario Mandzukic a rawn lut a, amaherawhchu first half ang thoin Barcelona-in ball an chang tam chhunzawm zel a. Mualneitu lam hian clear chance an nei thei lo a, Andres Iniesta ball pet erawh keeper Oblak-a'n a dang ṭha hle.

Goal khung loh vangin Barcelona an talbuai hman a, hun tawpah erawh goal an sual chhuak hram. Sergio Busquets tih tluk vangin Juanfran-a'n penalty a chawi a, Messi-a'n chakna goal a khung zui bawk.

Barcelona bawkin goal khung theihna an nei leh a, goal erawh a luh belh tawh lo. Vicente Calderon-ah an inkhel leh dawn a, goal khata hmahruaitu Barcelona an la him bik lo.

Eng nge an sawi?

Barca midfielder Andres Iniesta chuan, "Result ṭha tak a ni. Second leg-ah minute 90 dang khelh tur a la awm a, semifinal kan la lut lo," tiin a sawi.

Barca coach Luis Enrique chuan, "Result duhawm tak a ni. Kan khingpuite hi kan hre chiang a, an coach kan hria a, tun hnai season-a kan inkhelh dan thlirin semifinal lut tur chuan 50-50 chance vel an la neiin ka hria. 1-0 in chak mah ila an khelmuala second leg kan khelh dawn avangin kan hmabak hi a la ko hle a ni," tiin a sawi.

Atletico boss Diego Simeone chuan, "Kan khingpuite an khel ṭha a, kan chak zo lo. Amaherawhchu, semifinal lut turin kan tan kawng zau tak a la inhawngin ka hria," tiin a sawi.