Mizoram tan Meghalaya hneh a ngai

Santosh Trophy champion lai Mizoram-in final round khel turin Meghalaya an hneh ngei ngei a ngai a, vawiin tlai dar 2:00-ah 2014 Dr TAo Football final-a inhmachhawn te hi Assam-a Marigaon-ah a inkhel dawn.

69th Senior National Football Championship for the Santosh Trophy Northeast Zonal Round-ah Mizoram hi Meghalaya leh Tripura nen group khatah an awm a. Thawhṭanni khan Mizoram hian Tripura hi 2-0 in an hneh a, amaherawhchu Meghalaya hian Tripua hi 3-0 a an hneh ve leh avangin Mizoram hian Meghalaya hi an hneh ngei ngei a ṭul ta a ni.

Dinhmun ngaiah

Nikum khan Mizoram-in Northeast Zonal Round a thleng a; Mizoram hi Nagaland, Arunachal Pradesh leh Manipur te nen group khatah an awm. Vawi hnih khelh zawhah Mizoram aiin Manipur goal difference a ṭha zawk a, Mizoram tan final round khel turin Manipur hneh a ngaih phah.

January 31, Zirtawpni tlaiah Lammual khatin mipui an pungkhawm a, minute 82-naah chauh goal a lut a, goal khungtu chu R. Laldanmawia a ni. MPL1 best player leh Zico Zoremsanga te goal hmangin Mizoram-in Manipur 2-0 in an hneh a, final round an thleng a, Silliguri-ah Mizoram chu India ram champion an ni.

Dr TAo Football final Rematch

Nikum vek khan Mizo­ramin Dr TAo Football an thleng a, group stage-ah Meghalaya 4-0 in an hneh a, he team bawk hi vawiina an hmachhawn tur a ni. Chak tur a chiang lo tih nemnghettu erawh final-a Mizoram chak dan kha a ni. Group Stage-ah Mizoram chak chiang mah se final-ah hun pangngaiah 1-1 in an inhnehtawk a, extra time-ah goal a luh belh lo. Penalty shootout-ah Mizoram-in Meghalaya hi an hneh hram.

Mizoram XI chu

Mizoramin Tripua an hneh ṭumin keeper-ah Chanmari FC goalkeeper Lalawmpuia an hmang a. Left back-ah Chanmari FC player Ruatthara awmin a laiah Dinthar FC captain Ronald Zothanzama leh Chanmari FC defender Lalrinchhana-te an inkawp a, right back-ah Dinthar FC player Lalrinzuala a ding.

Shillong Lajong captain hlui Dinthar FC-a lut ta Samson chu central midfielder niin ani hi Chanmari FC player Ricky Lallawm­awma leh Dinthar FC midfielder Johny Lalfakzuala-te'n an pui a; vei lam sirah Chanmari FC winger H. Lalmuankima awmin a ding lamah MPL-3 top scorer Lalbiakhlua (Mizoram Police) a ding bawk a, tlar hmaah Chanmari FC utility player Joseph Lalnunpuia mal tlatin bul a ṭan.

Vawiina Mizoram XI tur hi chiang taka hriat a ni lo a, an tih danglam tam erawh a rinawm lo. Match hmasa lama defensive midfielder Ricky chu left back-ah an chhawr thei a, Ricky hi tlar hnungah a awm a nih chuan a hmunruakah Joseph-a a awm thung ang.

Tlar hmaa mal tlat tur chu Chanmari FC forward Lalruatfela a ni thung. Mizoram head coach H. Vanlalthlanga'n Vanglaini palai a hrilh danin player position hi a danglam ngei dawn niin a lang a, formation erawh match hmasa lam ang thoin 4-5-1 a ni ang.

Eng nge an sawi?

Mizoram coach H. Vanlal­thlanga chuan, "Tripura kan khelh ṭum khan field kha kan hmang thiam lo a ni. Aizawl-ah ground ṭhaah kan practice a, Assam-a kan inkhelhna hi chu a chang a, a lian bawk. Kan game structure angin kan khel thei lo a, tunah erawh ni thum lai kan practice leh tawh a, kan game-ah chuan hmasawnna a awm ngei ang," tiin a sawi.

Veteran coach Thlanga chuan sawi chhunzawmin, "Santosh Trophy-ah chuan team chhe tak tak an awm lo. Meghalaya hi kan hneh mai chu kan ring a, mah se chesual thei kan ni. Ṭha taka kan khelh theihna tura Mizo mipui ṭawngṭaina kan mamawh a, final round thleng turin vanneih kan mamawh a ni," tiin vanduai thei an nih thu a sawi.