Spurs-in Sheffield United an hneh

Nilai zana Capital One Cup semifinal inkhelah mual neitu Tottenham Hotspur-in Andros Townsend goal hmangin Sheffield United 1-0 in an hneh. January 28-ah Sheffield khelmual Bramall Lane-ah second leg khelh tur a ni.

Semifinal khelh hma hian English football-a thil thleng khat kan hmu a, mikhual team Sheffield United hi traffic jam vanga an thlen tlai avangin inkhelh hun hi minute 15-a tih tlai a ni.

White Hart Lane-a inkhelah hian Spurs hian League one club Sheffield lakah inkhel an thunun a, goal khung erawh an harsat thung. Minute 74-naah ṭul lo takin Sheffield player Jay McEveley chuan penalty area-ah a kutin ball a khawih a, a penalty chawi chu English winger Townsend-a'n goal-ah a chantir.

Nigel Clough-a enkawl Sheffield hian semifinal thleng turin Premier League club West Ham leh Southampton hneh mah se Nilaini zan inkhelah Spurs hneh thei turin an khel ṭha tawk lo. Penalty aṭang bakin goal a lut lo a, team pahnih goal awm loin an inhnehtawk.

Eng nge an sawi?

Tottenham boss Maurico Pochettino chuan, "Tunah chuan inkhel hmasa a zo a, he inkhelah hian chak zawk ni mah ila goal khat chauh kan khung avangin final kan la lut chiang lo. Wembley thleng turin Sheffield khelmualah hun harsa tak kan hmachhawn leh ang," tiin a sawi.

Spurs midfielder Ryan Mason chuan, "Game plan mumal tak an neih avangin inkhel harsa tak a ni. Kan khel ṭha a, chak result kan nei a, inrintawkna nen second leg kan khel thei tawh ang," tiin a sawi.

League Cup-ah Tottenham hian an khelmualah record an nei ṭha a, White Hart Lane-a an inkhel hnuhnung 27-ah goal an la khung vek. January, 1999 khan Wimbledon nen goal awm loin an inhnehtawk a, chu chu goal an khung lohna inkhel hnuhnung ber a ni.