MPL4 Qualifiers Luangmual dinhmun a chiang ang em?
Season hnih chhung Mizoram Premier League tihmuhnawmtu Luangmual FC tan MPL let lehna kawng a inhawng zau leh ta hle.
Vawiin chawhnu dar 2:00 hian Luangmual FC-in Aizawl khaw pawn club awmchhun Lunglei club Zotlang FC an hmachhawn ang a, chawhma dar 11:00-ah Electric FC leh Upper Republic FC an inkhel ang.
Inkhel pahnih result a zirin Luangmual FC hi MPL4 khel turin an dinhmun a chiang ang.
Electric FC Vs Upper Republic FC
Aizawl DFA hnuaia club Electric FC leh Upper Republic FC hi tun season-ah ṭum hnih an inkhel tawh a, Upper Republic an chungnung zawk ve ve. ADFA hnuaiah Season Opening Tournament-ah Upper Republic hi extra time-ah an chak hram a, Mid Season Football-ah 3-2 in hnehna an chang leh bawk.
Kumin record thlir chuan Upper Republic FC hi chak zawk tura beisei an ni a, mah se MPL4 Qualifier-ah Luangmual FC 6-2 ngawta an hneh loh avangin Upper Republic ṭhat dan hi hriat thiam a harsa hle. Electric FC hian Zotlang FC lakah point khat an hlawhchhuak tawh a, Upper Republic aiin table-ah an sang zawk nachungin an ṭha zawk tihna erawh a ni lo.
Eng nge an sawi?
Electric FC manager F. Lalhmangaihsanga (Duata) chuan, "Upper Republic hi season opening leh Halflong-a champion thei an nih avangin team ṭha an ni tih a chiang a, an ṭha tih kan hria. MPL4 khelh ngei kan duh avangin theihtawp chhuahin kan khel dawn a, Upper Republic hi hneh ngei kan tum," tiin a sawi.
Upper Republic FC president R. Lalhrilliana chuan, "Electric FC hi tun season-ah ṭum hnih kan hneh tawh a, kan hneh leh turah chuan ka ngai. Amaherawhchu, game hi chu sawi lawk a har ṭhin khawp mai, kan sawi lawk theih chin chu Luangmual FC kan hneh loh ṭum nen chuan kan danglam dawn, player leh khelh dan hmang kan thlak ang," tiin a sawi.
Luangmual FC Vs Zotlang FC
MPL2 finalist Luangmual FC hian an game hmasa berah Upper Republic FC 6-2 in an hneh a, an ṭha bik tih an nemnghet. Luangmual hian MPL4 khelh ngei an tum a, Mizo player langsar Jerry Zirsanga, Aldrin Zonunsanga, Zodinliana, Lalhlimpuia leh Daniel te bakah local football-a tawnhriat nei ṭha tak tak an kawl avangin MPL4 Qualifier khel team dang nen chuan an squad chhah dan a inthlau hle. Player ṭha awm khawmna team hmachhawn hi Zotlang FC hmabak a ni a, Lunglei khaw club fiahna tur a ni bawk. Zotlang hian Luangmual FC an hneh thei a nih chuan MPL4 khel turin an ṭha tawk tih a chiang ang.
Eng nge an sawi?
Luangmual FC manager Lalṭhazuala chuan, "Team ṭha ber tura kan rin Upper Republic FC kan hneh tawh a, football-ah chuan upset a thleng thei nachungin Zotlang FC leh Electric FC te hi chu an inkhel kan thlir aṭangin an nem deuh turah ka ngai. Kan squad a lian ṭha a, Upper Republic kan khelh ṭum nen chuan kan danglam hret ang, chak erawh kan tum," tiin a sawi.
Luangmual boss chuan sawi chhunzawmin, "MPL a kir leh ngei kan tum a, chumi tur chuan player pawh kan theih ang a ṭha kan la lut. Sum ṭhahnem tak kan mamawh a, min sponsor-tu Samsung 3:16 Plan Solution, Nextcomm Racing Team, Nextcomm Consultancy leh Mamuani Enterprise te chungah kan lawm takzet a ni," tiin a sawi.
Zotlang FC coach Jimmy L. Sailo chuan, "Luangmual kha an khel ho ṭhang tih a hriat a, an game an hmunawm a, hneh an har ang. Chutihrualin MPL4 khel kan tum a nih chuan anni hi kan hneh tur a ni a, chak ngei tumin kan khel ang. Kan training ang a kan khelh chhuah theih chuan inkhel hmuhnawm tak kan lantir theih ka ring," tiin a sawi.
MPL4 QUALIFIERS
RESULTS (January 16, 2014)
Zotlang FC, Lunglei 0 - 0 Electric FC
January 17, 2014
Upper Republic FC 2 - 6 Luangmual FC
Upper Republic : Lalremtluanga 77'; Lalruatpuia 90'
Luangmual : Jonathan Lalsangzuala 14', 15'; Lalṭhazuala 41', 84'; Vanrammawia 72'; Lalhlimpuia 90+5'
FIXTURES
Vawiin Inkhel Tur
11:00 AM Electric FC Vs Upper Republic FC
02:00 PM Luangmual FC Vs Zotlang FC, Lunglei
January 28, 2014
11:00 AM Zotlang FC, Lunglei Vs Upper Republic FC
January 28, 2014
02:00 PM Electric FC Vs Luangmual FC
STANDINGS
# Team Pld W D L GF GA GD Pts
1 Luangmual FC 1 1 0 0 6 2 4 3
2 Electric FC 1 0 1 0 0 0 0 1
3 Zotlang FC, Lunglei 1 0 1 0 0 0 0 1
4 Upper Republic FC 1 0 0 1 2 6 -4 0