Real Madrid-ah Norwegian star

Kum 16-a upa Norwegian forward Martin Odegaard leh Real Madrid an inbe fel a, Stromsgodset aṭangin Odegaard an la lut.

Odegaard hian nikum August thla khan kum 15 leka upa nichungin Norway tan a inlan der tawh a. Norway team tana player inlan thei naupang ber record neitu a ni. Talent nei ṭha bik a nih avangin Europe club lian tak tak ten anchuh nasa a, Odegaard duhtu langsar zingah Manchester United, Liverpool leh Arsenal mai bakah Bayern Munich te pawh an tel a. A tawpah Real Madrid-in an chang ta hram a ni.

Real Madrid hian Norwegian forward lei nana an pawisa sen zat hi official in tarlang lo mahse Spanish media lam chuan Odegaard man hi euro matkaduai thum niin an tarlan.

Tunge Odegaard?

Odegaard hian Norwegian Premier League-a player zinga naupang ber ni turin nikum khan Stromsgodset tan a inlan a, Norwegian club tan hian ṭum 23 khelhah goal nga a khung a. Norway football league sang berah hian goal khung thei naupang ber record a nei nghe nghe.

Kum 16-a upa Odegaard hi ke veilam hmang thiam tak a ni a, Barcelona thiampuipa Lionel Messi nen khaikhin a ni.

Real Madrid boss Carlo Ancelotti chuan, "Naupang te ni chungin a talent a ropui a, mize ṭha tak a nei tel bawk," tiin Norwegian rawlthar chungchang hi an lakluh hmain a lo sawi tawh.

Odegaard hian senior team tan a khelpha nghal dawn lo a, Real Madrid star hlui Zinedine Zidane hruaina hnuaiah Real Madrid B team-ah bul a ṭan nghal beisei a ni.