Mizoram Under 14 team an tla India camp-ah Mizo player pali thlang

Coca Cola Cup National Sub Junior Football Championship Goa-a khelhah nimin khan Mizoram chuan Kerala 2-3 in an hneh lo a, an tla ta. Hetihlai hian Mizo player palite chu AIFF-in India Under 15 camp neih mekah trial turin an ko thung.

Mizoram hian an group match hmasa berah Jharkhand chu 2-3 bawkin an lo hneh lo tawh a, he mi hnu hian Haryana leh Maharashtra hnehin an dinhmun an siam ṭha hret a, group match hnuhnung berah draw chiah an mamawh tawhlaiin Kerala chuan 3-2 in an hneh a, Mizoram hi an tla ta a ni.

Inkhel chanchin

Mizoram hian inkhel hnu­hnung berah hian draw chiah an mamawh. Inkhel an ṭan a, draw chiah mamawh mah se chak ngei tumin an nawr a, Larry Lalrinawma chuan minute sarihnaah goal a thun nghal mai a, Lengpui rawlthar hi inkhel hmasaa hattrick siamtu kha a ni a, Mizoram-in 1-0 in hma an hruai.

Kerala tan semi final lut turin goal hnih an thun ngei ngei a ngai tawh a, chuvangin phurh belh huamin an nawr. An tumah an hlawhtling a, minute 18-naah an si phurh an sût nghal mai. Mizo naupangte an insiam ṭha hman lo a, an khingpuite hian minute 20-ah an thun zui a, minute 24-ah thun belh lehin minute ruk chhungin goal thum teh meuh mai an chhuah.

Mizoram hi insiam ṭhain ball an chang tam a, goal an nawr lêt ve thung. Kerala lamin an goal venhim chu hna berah an nei tawh a, an tlan chhuak duh tawh si lo. Jeremy Laldinpuia'n minute 70-naah goal a khung a, a tawp minute 20 chhungin goal khat thun belh se semi final an lut ni mai tur, an thun belh thei ta si lo a, Mizoram an tla ta.

Chak lo chhuanlam!

Mizoram an chak lo a, Kerala an hneh lo. Jharkhand pawh an lo hneh lo tawh bawk a, champion an phû lo pawh a ni thei a; nimahsela an kum rualpui leh an tiatpui inkhel ni se chak an inring hle.

Mizoram team enkawltute chuan Vanglaini hrilhin pumrua­ah an inthlau a, kum bithialh inkhel mah ni se an inupat hleih tih a lan thu an sawi. Kum inang tlangah Mizote chu tê lutuk bik tur nia an inhriat lohlaiin an khingpui apiang mai an tiat lo thei hle a, tharumah an khan lo a, ball an inpet nat hleih hle niin an sawi bawk.

Mizoram assistant manager Lalnunsanga chuan, "Kan hneh loh hi chu kan pawm thiam a, kan hneh loh dan erawh a na khawp mai. Kan naute an la no deuh a ni e. Min rawn nawr thut kha kan tuar lo a, goal kan chhuah kha an la naupan deuh si avangin an buai phah tlat a, an ṭang ve bawk si nen an talbuai chhungin goal dang a lut leh ta mai a, kan insiam ṭha zo ta lo a ni," a ti.

An khingpuite chungchang sawiin, "Keini chu hotute duh danin fair takin kan inthlang a, kum dik tak vek kan ni. Kan khingpuite hi an kum zat hre thei lo mah ila keini aiin an upa tih hi chu a chiang. Panga-paruk vel hmel en pawha upa tak hi an awm deuh zel a, an khelh danah leh an tharum neih danah a hmuh theih bawk. Chak loh chhuanlam chu a ni ber ang a, thil awm dan tak chu a ni ber e," tiin a sawi.

Mizo an hmu e

Semi final pawh thleng phak lo team aṭangin AIFF-a scout-te chuan Mizo player pali chu India camp zawm turin an thlang. Mizoram hi an khel ṭha a, anni aia thleng sang team pali an la awm chungin India camp zawm turin Mizo pali koh an ni.

Haryana laka chakna goal thuntu C Lalchungnunga, Zotuitlang (Lunglei District); Jharkhand laka goal hnih thuntu Jeremy Laldinpuia, Hnahthial; K Vanlalruata, Mamit leh goal li thuntu Larry Lalrinawma, Lengpui-te chu India camp zawm tura koh an ni.

Mizoram team hruaitute sawi danin anni hi Goa-ah hian an châm zui a ngaih hmel a, Mizorama haw zet tawh loin camp-na hmun tur an pan ang.