Messi hian min tiphur - Ronaldo

Real Madrid superstar Cristiano Ronaldo chuan an elpui FC Barcelona forward Lionel Messi chu amah tiphurtu leh dinhmun sang zawk a thlen theihna chhan a nih thu a sawi.

Messi leh Ronaldo te hi tun dinhmuna player ropui an ni satliah lo a, football history-a player ropui ni phak an ni. Football-a mimal chawimawina Ballon d'Or Award hnuhnung pasarih pawh heng player pahnih hian an hui fai vek a, Messi hian pali a dawng tawh a, Ronaldo hian pathum a dawng ve tawh bawk.

Portugal captain Ronaldo chuan, "Messi pawh hian kan pahnih inkara inelna awm hi amah ti phurtu atan a hman ve ngei ka ring. Ka tan pawh el tur awm hi a ṭha a ni. Hmasawn duh chuan elpui kan neih a ṭul a ni," tiin a sawi.

Kum 29-a upa Ronaldo chuan, "Ani hi khawvela player ṭha ber zing ami a ni a, a chunga awm hi chu a harsa khawp ang. Chutihrualin team khata khelh ho erawh ka chak khawp mai. Player ṭha tak tak ka khelhpui theih avangin ka lawm a, Messi bula khelh hi a chakawmin ka hria," tiin a sawi.