Australian Open Federer a tla, Murray leh Nadal an kal zel

Australian Open khelh mek zel-ah mipui beisei loh zawk result a thleng zel a, Roger Federer leh Marcos Baghdatis te'n an tumpui an hneh zawh loh laiin Rafael Nadal leh Andy Murray te erawh an chak a, Australian Open fourth round an lut.

Federer a chak zo lo

Zirtawpni tlai a Australian Open tennis entu te'n an beisei loh result an hmu a, Australian Open a vawili lai lo champion tawh leh World No 2 Roger Federer chu Italian world No 46 Andreas Seppi hmaah a tlawm.

Seppi leh Federer te hi tunhma in vawi 10 an lo inhmachhawn tawh a, heng an inhmachhawn tawh ah te hian Federer hian hnehna a la chang vek a ni. Mahse, nimin tlai a Melbourne Park a inkhelah erawh thil danglam a thleng a, ṭum danga ala tih theihloh tiin Seppi hian darkar hnih leh minute 57 chhungin 6-4,7-6 (7-5), 4-6, 7-6 (7-5) in Federer a tlawm a ni. He inkhela chak zawk Seppi chuan, " ka game khelh tawh zinga ka khelh ṭhat ber pawl niin ka hria, chuti nilo se hnehna ka chang kher lo ang, " a ti a, Australian Open fourth round a lut thei chu a lawm hle. Seppi hian fourth round ah Australian Nick Kyrgios a tum ang.

Murray a kal zel e

World No. 2 Federer a tlawm lai hian Britain fapa chuam World No.6 Andy Murray erawh a kal zel a, Australian Open fourth round lut turin portuguese mi João Sousa chu 6-1, 6-1, 7-5 in darkar hnih chhungin a hneh a ni.

Kum 13 chhunga portuguese player zinga Grand slam tournament third round khel leh hmasa ber Sousa chu fakin Murray chuan, " A tih ṭhin fo angin Sousa kha a rawn khel ṭha hle a ni, " a ti a,a game khelh leh tur thlirin Murray chuan "match thum inkar hlat lo tak takin ka khel a, game tin hi a harsa zel dawn a ni" a ti bawk.

Murray hian fourth round ah bulgarian Marinko Matosevic a tum ang. A ni hian 4-6, 6-3, 3-6, 6-3, 6-3 in Marcos Baghdatis a hneh ani.

Nadal an dal thei lo

Beisei loh takin Roger Federer Australian Open aṭangin a tla a, a elpui ber Rafael Nadal erawh dal thei an la awm hrih lo. Rod Laver Arena a inkhelah kum 28 mi Nadal hian Israel lam chhuak Dudi Sela 6-1 6-0 7-5 in a tlawm a ni.

Inkhelh zawhah Nadal chuan, "Tihsual neilo in ṭha takin inkhel bul ka ṭan thei a, kha kha ka chakna hnar niin ka hria, " a ti a, Nadal chuan sawibelhin, " third set na ah khan a rawn khel ṭha a, ka buai hman ṭep a, mahse ka insiam ṭha leh hram hram a ni. Ka taksa a la chak lo rih em em a, hnehna ka chang thei kha ka vannei hle, " tiin a tumpui chu khelhpui hautak a tih thu a sawi. Nadal hian fourth round ah South African Kevin Anderson a tum dawn a ni.

Hmeichhe lamah Sharapova a kal zel

Zirtawpni tlaia hmeichhe inkhelhah Russian tennis star Maria Sharapova chuan 6-1 6-1in Israel mi Zarina Diyas chu awlsam takin a hneh. Inkhelh zawh ah grand slam title pangnga la tawhtu Maria Sharapova chuan, "ka khel ṭha thawkhatin ka hria, concentration hlauh loh kha ka tum ber a ni a, ka tum ka ti hlawhtlingin ka hria," tiin an inkhel chungchang a sawi. Maria Sharapova hian last 16 ah Chinese nula seeded 21 Peng Shuai a tum dawn a ni.