Swansea-in Naughton an lei fel

Swansea City chuan Tottenham aṭangin Kyle Naughton an lei a, kum thum leh a chanve daih contract an ziahpui a ni.

Swansea boss Garry Monk chuan, "Naughton hi kan hnena a khelh theih nan hun rei tak inbiakna kalpui a ni a, tunah chuan Swansea player dik tak a ni ta. Lehkha tih fel ngai pawh zawh a ni a, medical a paltlang tawh bawk," tiin Naughton an lei fel tawh thu a sawi.

Kum 26-a upa full-back Naughton chuan, "Tun transfer chungchang hi nipui lai aṭang tawhin sawi rik a awm tawh a. Thil ṭul zawng zawng kan ti fel thei hi thawventhlak ka ti takzet a ni," a ti.

Naughton chuan sawi chhunzawmin, "Swansea-ah player ṭha tak tak an awm tih ka hria a, regular taka khelh phak hi ka tum ber a ni. Ka chhuahsan tak Spurs hi club ropui an nih avangin chhuahsan pawh hrehawm ka ti a, mahse tunah chuan Swansea player ka ni tawh a, Welsh club-ah hian a tam thei ang ber khelh ka tum," a ti.

English defender Naughton hian kum 2009 khan Sheffield United aṭangin Tottenham a zawm a, Spurs tan hian vawi 74 a in lan hman. Naughton hi January transfer-a Swansea player lei thar palina a ni.

Zaninah Swansea hian FA Cup fourth round-ah Blackburn Rovers an hmachhawn ang.