Chelsea-in loan-in player pahnih chhuah tir

Season chanve chhung atan Chelsea chuan Nathaniel Chalobah leh Marko Marin te loan-in an chhuah tir.

Kum 20-a upa Chalobah hian nikum khan Burnley-ah loan-in a chhuak a, tun season tirah Chelsea zawm leh mahse khelhna hmun a chan tam loh avangin intuai hriam leh turin Championship club Reading a zawm.

Chalobah hi khelmual a player daihzai tak mai a ni a, defence emaw midfield emawah a chhawr theih a ni. Chelsea youth system chhuak Chalobah hian loan-in club hrang hrang Watford, Nottingham Forest leh Middlesbrough tan a lo khel tawh.

German midfielder beiseiawm ber zing ami Marin hian kum 2012 khan Werder Bremen aṭangin Chelsea a zawm a. London club-ah Marin-a'n hming a chher thei lo a, Werder Bremen tana a khelh laiin ram tan khel pha mahse tunah chuan Germany jersey a ha pha tawh lo.

Kum 25-a upa Marin hian Pro League champion lai Anderlecht a zawm ang.

Anderlecht general manager Herman Van Holsbeeck chuan, "RSC Anderlecht hian player ngah aiin player ṭha neih kan ngai pawimawh zawk. Marin kan la lut thei hi kan club tan thu lawmawm a ni a, Chelsea pawhin an hlawkpui ka ring. German player hian Anderlecht hi result ṭha tak min neih pui theih ka beisei," tiin a sawi.