Arsenal hmaah Brighton & Hove Albion

FA Cup-ah champion lai Arsenal chuan Pathianni zan dar 9:00 hian Amex Stadium-ah Brighton & Hove Albion an hmachhawn dawn a, Arsene Wenger leh a hote tan kawng harsa niin a lang lo.

Arsenal leh Brighton hi FA Cup-ah ṭum li an inkhel tawh a, London club hi an chak vek. Brighton hian an khelmualah FA Cup ṭum 12 an khel tawh a, vawi khat chiah an la chak lo. An hneh lo chu Arsenal an ni a, January 2013 khan 2-3 in an hneh lo.

Laipui a inpeih

Premier League kartawp inkhela Manchester City 2-0 a hnehtu Arsenal tan tun hi an ṭhat lai tak a ni.

Theo Walcott chuan a inhliam hnuah Gunners tan minute 127 a khel leh tawh a, chance ṭha hnem tak a hlah tawk. Kum naupang ni chunga lar thei Walcott hian inrintawkna nei turin goal a mamawh a, January 2013-a Brighton lama chakna goal khungtu hian tuna an inkhelh leh tur hi inrintawkna nei turin a hman ṭangkai a ṭul a ni.

Arsenal tan Mathieu Flamini midfield-ah a pawimawh ṭhin a, Wenger-a hnuaia khel zel turin player naupang zawk Francis Coquelin a tluk phak a ngai. French midfielder contract hi tun season tawp rualin a tawp dawn a, pawtsei tur chuan field chhungah a chetṭhat a ṭul dawn a ni.

January transfer-a Lukas Podolski leh Yaya Sanogo te loan-a an chhuah takah chuan Joel Campbell tan khelhna hun a inhawngah a ngaih theih. Costa Rica striker hian Brigton lama a khelhna hun a chang lo a nih chuan football career hlawhtling zawk nei turin Arsenal chhuahsan a fuh ang.

Brighton hi...

Chris Hughton enkawlna hnuaia khel Brighton tana player pawimawh tur chu Liverpool aṭanga loan-a khel mek Joao Teixeira a ni ang. Teixeira hian Ipswich Town 3-2 a an hneh ṭumin goal hnih a khung a, Portuguese midfielder hi Arsenal tlar hnung tan a hnawk thei ang.

Le Professeur thukhawchang

The Professor hming lem an vuah Arsenal manager Arsene Wenger chuan, "An striker-te kan chet tir loh a ṭul a ni. Cup inelnaah reng reng chuan a tir aṭangin chet ṭhat nghal a ṭul ṭhin. Kum hnih kalta khan Brigton kan hmachhawn tawh a, Gus Poyet-a hnuaiah harsa takin kan hneh hram. Tun ṭumah pawh hian tawnhriat nei ṭha tak Chris Hughton hnuaiah an khel dawn a, awlsam taka hneh theih a ni lo ang," tiin a sawi.

Wenger chuan Pathianni zan hian German midfielder Mesut Ozil chu starting eleven-a a tel tur thu a sawi tel bawk. Ozil hian tun hnaiah beisei a pha lo a, London club tana hmun pawimawh chang leh turin FA Cup hi a hman ṭangkai a ṭul ang.