Coppa Italia quarterfinal khel tur a chiang ta

Ningani zan khan Coppa Italia champion lai Napoli chuan player 10-a khel Udinese chu penalty shootout-ah an hneh a, quarterfinal-ah Sampdoria hnehtu Inter Milan an hmachhawn ang. Italian club-te knockout inelna ngaihhlutah hian AC Milan, Lazio, Parma, Juventus, Roma, Fiorentina, Napoli leh Inter Milan te'n quarterfinal an lut.

Champion lai Napoli hian January transfer-a an lak luh Manolo Gabbiadini chu a vawi khatna atan an la lut a, keeper lut khat tak Simone Scuffet-a'n goal venhim hna a thawk bawk.

Inkhelh ṭan aṭanga minu­te hnihna lekah Napoli forward Duvan Zapata chuan Gabriel Silva lakah penalty a hlawhchhuak a, Dries Mertens-a'n goal-ah a chantir thei lo.

Udinese pawhin goal khung ngei tumin an nawr a, Cyril Thereau ball pet chu goal zawnah a kal lo a, Napoli defender Walter Gargano handball vanga an penalty beiseina a hlawhtling lo bawk.

First half-ah chance ṭhahnem tak awm mah se goal a lut lo a, second half-ah erawh goal a lut har lo. Minute 58-naah kum 18-a upa Udinese midfielder Nabil Jaadi chuan ṭha taka a lak luh hnuah Cyril Thereau tan a siam sak a, French forward hian Udinese hmahruaina goal a khung.

Napoli an vannei nawn a, ṭum hnihna atan penalty an hmu a, Brazilian midfielder Jorginho chuan keeper bumin an siphurh a sut. Minute thum hnuah Udinese Silvan Widmer chu hnawhchhuah a ni a, amaherawhchu Napoli hian an tam zawkna an hmang ṭangkai lo. Minute 90-ah 1-1 in an inhnehtawk.

Extra time khelh a ṭul a, Napoli supporter-te lungawina atan captain Marek Hamsik chuan minute 99-naah a khung a. Napoli hi chak mai tura ngaih ni tawh mah se Udinese an tlawm duh lo a, Grik midfielder Panagiotis Kone chuan kawh zetin minute nga hnuah an si phurh a sut.

Extra time khelh zawhah an inhnehtawk a, penalty shootout-ah Napoli an chungnung zawk. Penalty aṭanga chakna goal khungtu hi Gonzalo Higuain a ni a, Napoli hian nikum December thla khan Super Cup-ah Juventus chu penalty shootout-ah tho an lo hneh tawh bawk.

Napoli manager Rafa Benitez chuan, "Penalty kan hlah khan kan khingpuite inrintawkna a pe a ni. 2-1 a nih hnu kha chuan chak mai tur kan ni a, Udinese khan an rawn sut leh, khatiang hunah chuan kha ai khan kan defending a ṭhat a ṭul a ni," tiin a sawi.

Benitez chuan referee thutlukna chungchanga zawhna sawi chhunzawmin "Referee chungchang hi ka sawi ngai meuh lo. Kum khat leh a chanveah vawi khat te chu ka sawi ve ang. Amaherawhchu coach tam tak hi chuan nitinin referee thutlukna an sawisel

ṭhin. Chutiang coach chu kan ni lo," tiin a sawi.

Quarterfinal Fixtures

AC Milan Vs Lazio

Parma Vs Juventus

Roma Vs Fiorentia

Napoli Vs Inter Milan