Santosh Trophy Mizoramin final round thleng ta
Chak mamawh Mizoramin nimin khan Meghalaya 3-0 in an hneh a, 69th Senior National Football Championship for the Santosh Trophy final round khel turin an tling.
Marigaon, Assam-a inkhelah hian Mizoram tan Joseph Lalnunpuia, Malsawmfela leh H Lalmuankima te'n goal an khung a, Northeast Zone group dang aṭangin Assam chuan final round an lut bawk. Final round hi Goa-a khel tura ruahman a ni a, February 20-a ṭan tur a ni.
Mizoram hian Tripura 2-0 in an hneh tawh a, Meghalaya hneh lehin vawi hnih khelhah point ruk an hmu a, goal chhuah loin final round an thleng a ni.
Formation hman thiam
Football-ah formation ṭha leh danglam tak tak a chhuak a, chutiang inrem dan hrang hrang karah chuan 4-4-2 formation a chuai thei chuang lo. He formation hi Mizoram coach H Vanlalthlanga hman thiam a ni a, Mizoram hi nimin khan khan 4-4-2 formation hmangin an inrem.
Mizoram-in Tripura an hneh ṭuma starting eleven aṭangin player pakhat an thlak danglam a, Lalruatthara aiah Lalruatfela'n bul a ṭan. Chanmari FC forward Fela hi Joseph nen tlar hmaah an inkawp a, midfield laiah Johny Lalfakzuala leh Samson Ramengmawia-te awm a, a sirah H Lalmuankima leh Lalbiakhlua-te an awm thung.
Tlar hnungah Ricky Lallawmawma, Ronald Zothanzama, Lalrinchhana leh Lalrinzuala-te an intlar a, keeper chu Lalawmpuia a ni.
A goal nghal
Mizoramin minute hnihna lekah Joseph-a hmangin goal an khung nghal a, vei lam aṭanga Rinchhana cross ball chu Chanmari forward hian ṭha taka lo dawngin Mizoram goal hmahruai a khung.
Mizoram-in chance an nei chhunzawm a, Joseph-a'n chance dang a nei nghal a, keeper a sep khum theih loh avangin goal hnihna a khung lo. Mizoram-in Dinthar midfielder Samson-a leh Johny-a te kaihhruaina hnuaiah first half an thunun a, goal erawh an khung belh thei lo. Hun chanve hma lamah hian Meghalaya-in chance vawi khat chiah an nei.
A goal tlai
Meghalaya tan final round lut turin draw a tawk a, goal khat an mamawh. Second half-ah Mizoram aiin Meghalaya-in ball an chang tam zawk a, an goal bawh a na zawk bawkm a; amaherawhchu Meghalaya hian clear chance an insiam thei lo a, goal hnihna an khung theih loh avangin Mizoram dinhmun a him thei bik lo.
Substitute Sawmfela'n a danglamna a lantir a, minute 89-naah India junior international hlui hian ama penalty hlawhchhuah chu goal-ah a chantir. Goal hnih luh hnuah Mizoram dinhmun a ṭha a, MK-a'n injury time-a'n nalh takin a hlai goal leh a, Mizoram 3-0 in an chak.
Manager thusawi
Mizoram manager Lalbiakzuala chuan, "Chak kan tum a, chak hi kan duh ber a ni a, kan chak avangin kan lawm. Pathian malsawmna a ni e. Chutih rualin kan chak dan a hahthlak a, hun tawp dawn thlengin kan him bik lo a, goal chhuah palha tla thei reng kan ni a, a hahthlak khawp mai," a ti.
Player-te fakin Mizoram manager chuan, "Player-te fitness a ṭha a, an discipline a ṭha bawk a, hei hi kan lawm a ni. Marigaon-a khelmual hi kan hman ṭhan loh a nih vangin Thawhlehni aṭang khan nitin zing leh tlaiah training kan nei ziah a, kan ṭang em em a, chu chu kan result-ah a langin ka hria. Hun tawp dawna kan goal khungte hian a tawp thlengin kan ṭang thei tih a tilang a, a lawmawm khawp mai," tiin a sawi.
Coach a lawm
Mizoram coach Thlanga chuan, "Santosh Trophy hi state leh state inelna a ni a, eng team pawh hi khelhpui har tak vek leh vanduai theihna vek an ni. Tun ṭumah pawh hian I League club pahnih awmna Meghalaya hi team ṭha tak a ni a, chutihrualin kan khelh dan thlirin chak erawh kan phu ve hrim hrimin ka hria," tiin a sawi.
Santosh Trophy champion team leh tuna Mizoram team khaikhin tura Vanglaini palai zawhna chhangin Thlanga chuan, "Nikum kha chuan tun aiin training kan nei rei hret a, kan inkawp rei hman avangin team combination chu a ṭha zawkin ka hria. Tuna kan team hi beisei aiin hma kan sawn chak a, final round kan khelh meuh chuan kan ṭha tawh khawp ang. Final round kan thlenna chhan hi kan zir dana kan khelh vang a ni a, khelh dan bik kan zir a, tun aia kan bel chhoh chuan kan champion nawn theih ka beisei," tiin a sawi.
Inkhel Results
Mizoram 3-0 Meghalaya
Mizoram : Joseph Lalnunpuia 2'; Malsawmfela 89'(P);
H Lalmuankima 90+2'
Team Dinhmun
# Team Pld W D L GF GA GD Pts
1 Mizoram 2 2 0 0 5 0 5 6
2 Meghalaya 2 1 0 1 3 3 0 3
3 Tripura 2 0 0 2 0 5 5 0