Upper Republic insiam ṭha Luangmual-Zotlang inkhel an zo thei lo

Upper Republic FC chuan Mizoram Premier League season 4 khelh ngei tumin ṭan an la a, nimin khan Electric FC chu 6-1 in an hneh a, vawi hnih khelhah point thum an hmu.

Nimin chawhnu lama Lammuala inhkel erawh khelh zawh theih a ni lo a, Aizawl DC lamin Re­public Day inbuatsaihna tura inpuahchahna tura khelmual an chei vangin minute 30-ah inkhel tih­tawp a ni a, hetihlai hian Luangmual FC leh Zotlang FC, Lungleite hi 1-1 in an inhnehtawk. Tukin dar 8:00-ah Rajiv Gandhi Stadium, Mualpuiah an chhunzawm ang.

Upper Republic an tluang

Nimin chawhmaa Lam­muala ADFA 1st Divi­sion team pahnih inkhelah hian Upper Re­public FC hi kawng eng­kimah an chungnung zawk a, Electric FC lamin an khan lo deuh.

Vanlalsiammawia'n minute 34-naa a goal thun hmanin half time-ah Upper Republic an sang zawk. Second half ṭan a ni a, Ramdintluanga'n minute 47-naah a thun nghal mai a, Electric FC lam insiam ṭhat hmain Lalremruata'n minute 51-ah a thun belh a, 3-0 a ni der mai.

Electric FC beiseina siam turin minute 54-naah Lalbiaktluanga'n penalty aṭangin a thun a, goalkeep­er-in a dang teuh hle. Hemi hnu hian Upper Republic bawk an hlauhawm zui a, hun tawp dawnah Lal­hmingsanga leh Israela-'n an khung belh a, 6-1 in an tawp ta a ni.

Upper Republic hian khelh hnihah point thum hmuin January 28-ah Zotlang FC khelh hmabak an la nei a; point khat hmu Electric FC hian Luangmual FC an hmachhawn ve leh ang.

Inkhel an zo thei lo

Lammualah inkhel turin an kal a, inkhel zo loin an ṭin. Zotlang FC, Lung­leiin minute kuana lekah Lalruatmawia Chhang­te hmangin an tauh goal a, goal ṭha tak a ni. Nimahsela minute khat hnu lekah Luang­mual-in an sût a, Isaac Lalrinngheta chuan minute 10-naah a thun a, goal­keeper tihsualah a puh theih.

Minute 30 an inkhel hman tihah inkhel tihtawp a ngai. Lammual hman phalna hi MFA lamin hmu vek mah se, Republic Day hmana tura chei a ngai tawh tiin Aizawl DC thupek angin inkhelh chhunzawm phal a ni ta lo. Lammual chhung khelmual hi chu tihfai tawh a ni a, a sir ṭhutna leh a chhevelte tihfaia chei a ngai a, "Inkhel an awm chuan hnathawktute an tibuai," tiin Aizawl DC thupek angin inkhel hi tihtawp a ni.

Aizawl DC lam chuan January 23-ah hi chuan Lammual hi thil danga hman phalna pe tawh lo tura tih niin an sawi a, Republic Day inbuatsaihna atana hman tawh tura tih a ni. Hetihlai hian MFA hian December, 17, 2014 khan January 23-a Lammual hman phalna hi an nei tawh. Hei hi sût a nih loh bakah khelmual hman theih loh thu hi hriattir an ni lo a, Lammualah chawphcilh takin inkhel hi tihtawp a ngai ta a ni.

Tukin dar 8:00 hian inkhel hi chhunzawm leh tur a ni a, Rajiv Gandhi Stadium, Mualpuiah an chhunzawm ang.