India U-15 camp-ah Mizo naupang panga

All India Football Federation chuan India Under 15 camp-a awm turin Mizo naupang panga an thlang.

Coca Cola Cup National Sub Junior Football Championshp-ah Mizoram hian semi final pawh lut zo loin group stage-ah an tla a, heti chung hian AIFF scout-te chuan Mizo player panga an thlang. A tirah Mizo player pali thlan an ni zet a, pakhat dang J Omega, Saiha (New Colony) chu an ko tel a, India camp an zawm ang a, Goa-ah hian an châm tlang ta a ni.

Nimin lama tarlan tawh angin heng player pali - C Lalchungnunga, Zotuitlang (Lunglei District); Jeremy Laldinpuia, Hnahthial; K Vanlalruata, Mamit leh Larry Lalrinawma, Lengpui-te hi India camp zawm tura koh an ni bawk.

Mizoram manager Hmingsanga chuan, "Kan tum ber chu champion-a India team-a a tam thei ang ber luhtir a ni a, champion zo ta lo mah ila Mizo player panga an ko hi kan lawm a, mak pawh kan ti khawp mai. Semi final pawh thleng lo team aṭanga panga min ko hian thil tam tak a lantirin kan hria a, kan sawi tawh angin fair taka tiat leh tiat, mahni rualpui inkhelh chu ni se tun ai hian kan thlen san chu kan ring. Engpawhnise kan naute panga-in India camp an zawm tur hi kan lawm takzet a, player 20 an kal a, 15 chiah an haw dawn a ni," tiin a sawi.