Bradford-in Stamford Bridge an zawh chim zo ang em?
Zanin dar 8:30 ah Chelsea chuan an khelmual Stamford Bridge-ah League One club Bradford City an lo mikhual dawn.
Squad en chuan Chelsea hi chak tur chiang saa dah theih annih laiin Bradford City hi zuam sual an awl khawp ang! Chelsea tum tur Bradford hian Championship club Milwall 4-0 in an sawp a, tun hnai an league match pakuaah vawi sarih hnehna an chang bawk a, an phur vanglai tak a ni.
Hetihlai hian Bradford boss Phil Parkinson hian a squad pangngai a rem theiin a rinawm loh a, Striker Billy Clarke chu a hliam a la dam chiang lo a, midfielder Matthew Dolan leh defender Andrew Davies te erawh lo kir thei tawh tura beisei an ni.
Hetihlai hian an va len luhna tur Chelsea pawh hi tun hnaiah game pawimawh tak tak League Cup semi final second leg Liverpool nena an khelh turte leh Premiere League-a Manchester United nena an khelh tur ten a hmuak mek a, Jose Mourinho tan squad siksawi a ngai nualin a rinawm.
An players rinrawl Diego Costa, Eden Hazard leh Oscar te aiah Loic Remy, Didier Drogba leh Andre Schurrle-te an luh a rinawm a, hei pawh hi League One club Bradford tan chuan huphurhawm tak anni ang.
Etihad a leng lut tur Middlesbrough
Championship club Middlesbrough chu Etihad stadium-ah an leng lut dawn a, kum ruk chhung Premier League khel tawh lo Boro hian City hi khual-mualah an va tlawm thei ang em? Zanin dar 8:30 ah a hriat ang.
Premier League champion lai hi Boro coach Karanka chuan a hlau bik lo khawp a, "Manchester City nena kan inkar hi ngaihtuah chuan a zau hle tih hi phat rual a ni lo. Mahse, football chu football a ni a, chak zawk tur a sawi lawk theih loh" a ti a;League Cup third round a Andfield a penalty a an vanduai zawk ṭum inkhel thlir kirin Karanka chuan, "Inkhel harsa tak a ni dawn tih ka hria, mahse, Liverpool kan khelh ṭuma kan khelh ang khan kan khel anga, kan fight dawn a ni," a ti.
Boro lamah hian Ryan Fredericks, Rhys Williams, Muzzy Carayol leh Damia Abella-te hliam vangin an khelh theih a rinawm loh a, City lamah Samir Nasri leh mid-week-a Hamburg nena friendly match an khelh ṭuma inhliam Frank Lampard-te an khelh theih a rinawm loh bawk.