Manchester United an mualpho hmasa ber

Fourth round inkhel hmasa berah Cambridge United-in an mikhual Manchester United an chelh ding a, League two club hian Old Trafford-a replay khelh hi an phu an ni.

Louis van Gaal-a'n pound maktaduai 183 man starting eleven a rawn phochhuak a, chung zingah chuan British record siamtu Angel Di Maria bakah Radamel Falcao leh hmabak nei eng Adnan Januzaj an tel. Cambridge United starting eleven erawh loan, free leh academy chhuak te an nih avangin man an nei lo a, pawisa lama team pahnih inthlauhna hi a tam tak zet.

Field chhungah United an danglam tam lo a, goal bawh na chuang si lo a ball an chang tamna chu Cambridge aia an ṭhat zawkna chu a ni. United forward Falcao-a'n goal khung kawngah harsatna a nei chhunzawm zel a, a ṭhiante'n ball ṭha an pek theih lo a, a neih chhun chu keeper Chris Dunn-a'n a dan sak bawk.

United talbuai hnua bench aṭanga lut Robin van Persie, Ander Herrera leh Luke Shaw te kha pound maktaduai 83 man ni nachungin inkhel result an tih danglam phah lo. Second half-ah United an insiamṭha hret a, goal khung tur khawp erawhin harhtharna an chang lo. Substitute Van Persie leh Di Maria te'n chance ṭha an hlah.

Abbey Stadium-ah United-in goal khung an harsat ringawt lo a, an tlar hnung a nghing nasa bawk. Cambridge tlar hmate'n United tlar hnung an chhaih buai nasa a, keeper David de Gea-a'n nuam takin minute 90 chhung a hmang lo.

Referee-in final whistle a ham zawhah Cambridge supporter-te lawmin an zai a, an lam bawk. Manchester United team leh supporter-te erawh an hawi hai a, an hmel aṭangin an result-ah an lungawi lo tih a chiang hle.

An inthlau a ni

Cambridge manager Richard Money chuan inkhelh ṭan hmain a player-te chu United player-te nena kawr an inthleng chuan an jersey man Rs 3680.26 (£39.99) an chawi a ṭul tur thu a sawi a, halftime-a jersey an inthleng phei chuan second half-a kawr hak tur an nei loh tur thu a sawi bawk.

Inkhelh banah kawr inthleng an awm lo a, thil mak a ni lo. Chutihrualin Cambridge midfielder Tom Champion erawhin thleng chuang loin Michael Carrick-a jersey a neih sak thei hram. FA Cup fourth round-ah Cambridge United hi league dinhmun aṭanga chhutin an an hniam ber a, United nena an inkarah hian club 76 ngawt a awm.

Eng nge an sawi?

Cambridge boss Richard Money chuan, "Old Trafford-ah kan kal dawn a, nuam ti takin kan khel ang. Result eng pawh thleng se pawi tih tur a awm lo," tiin dressing room-ah player-te bulah a sawi.

Money chuan sawi chhun­zawmin, "Kan hlawhtlinna chungchanga kan lawm dan hi thuin kan sawi thiam lo. Dressing room-ah kan let a, ngai kan awh chho a, thil thleng kha a mak tulh tulh a ni," tiin a sawi.

Manchester United manager Louis van Gaal chuan, "Referee, pitch leh engkim kha kan lam ṭang an ni lo a ni. Lehlam supporter kha chuan min ṭan dawn lo tih chiang a, thil thleng pangngai a ni a, inkhel tinuamtu an ni. Yeovil Town leh QPR kan hmachhawn ṭumin first half-ah kan khel ṭha lo a, tun ṭumah pawh hian hun chanve hma lam kan khelh danah ka thinrim nawn. A pawimawh lai chu FA Cup aṭangin kan la tla lo, kan tan chuan Premier League-ah a champion theih tawh lo a, FA Cup hi nomawi chawi theihna a ni tih hriain kan ngai thutak a ni," tiin a sawi.